سیالکوٹ(بیورو رپورٹ)وزیر خارجہ اور حکمران جماعت پاکستان مسلم لیگ ن کے مرکزی رہنما خواجہ محمد آصف نے پاکستان تحریک انصاف(پی ٹی آئی)پر سنگین ترین الزام عائد کرتے ہوئے کہا ہے کہ تحریک انصاف نے مسلح ہو کر اسلام آباد آنے کا منصوبہ بنایا ہے،ایک صوبے کا وزیرِ اعلیٰ دوسرے صوبے پر حملہ کر رہا ہے،کالعدم تحریک طالبان(ٹی ٹی پی)تحریک انصاف کی ذیلی تنظیم ہے،جسے افغانستان سے یہاں منتقل کیا گیا،پی ٹی آئی نے سرحد پار افغانستان سے امداد لی، 10 سال بعد پھر اس نے وہی عمل شروع کیا۔
پاکستان ٹائم“کے مطابق سیالکوٹ میں میڈیا سے گفتگو کرتے ہوئے خواجہ آصف نے کہا کہ اسلام آباد میں مسلح جتھے آرہے ہیں جن میں سیکڑوں افغانی موجود ہیں،ڈی چوک پر جلسے سے خطاب کی دعوت بھارتی وزیر خارجہ کو دی گئی، بھارتی وزیر خارجہ کو خطاب کے لیے مدعو کرنا پی ٹی آئی کی ساکھ پر سوال ہے،میں نے کبھی اس قسم کے بیان نہیں دیے،عمران خان نے پورے پورے خاندان کو جیلوں میں رکھا، 2014ء میں بھی ان لوگوں نے دھرنا دیا اور اب بھی وہی کر رہے ہیں،اب ان حالات میں وفاقی حکومت ان کو کس قسم کا جواب دے؟ہم اس کو پاکستان دشمنوں کا حملہ قرار دیتے ہیں،ملک سے وفاداری مشروط ہے لیکن ان کی وفاداری اقتدار سے مشروط ہے،ہمارے ایک کرنل سمیت 6 جوان شہید ہوئے،ٹی ٹی پی کے سارے دہشت گرد مارے گئے،پی ٹی آئی کے کسی لیڈر کی زبان سے ان شہداء سے متعلق کوئی بیان نہیں آیا۔خواجہ آصف کا کہنا تھا کہ پی ٹی آئی کی دو شناخت ہیں،ایک طالبان اور دوسری بھارت،ایک بیان بتا دیں ان کا فلسطین سے متعلق ہو، وزیر اعظم نے یو این میں فلسطین سے متعلق آواز اٹھائی،اس پر بہت پزیرائی ملی،یہ جو مرضی کر لیں ہم انہیں اسلام آباد پر حملہ آور نہیں ہونے دیں گے،ہم اسے ملک دشمنوں کا حملہ تصور کریں گے۔انہوں نے مزید کہا کہ ایکسچینج ریٹ بہتر ہوا،پیٹرول سستا ہوا،بجلی کو سستا کرنے کے قریب ہیں،ان کو پتہ ہے کہ مہنگائی کم ہو گئی تو ان کا والی وارث کوئی نہیں رہے گا،یہ سب کچھ آپ کے سامنے ہو رہا ہے۔
