اسلام آباد(بیورو رپورٹ)حکومت رئیل سٹیٹ اور ہاوسنگ کے شعبے میں بڑی خوشخبری سنانے کے لئے تیار،عوام کے لیے مراعات کا پیکیج تیار کر لیا۔
”پاکستان ٹائم“کے مطابق وزارت ہاوسنگ کی 11 رکنی ٹاسک فورس نے 40 سے زائد اہم سفارشات و تجاویز مرتب کر لی ہیں،جس کے تحت رئیل سٹیٹ اور ہاوسنگ کے شعبے میں عوام کو مراعات دیے جانے کا پیکیج تیار کیا گیا ہے۔حکومت نے پراپرٹی اور ہاوسنگ سیکٹر میں گزشتہ بجٹ کے دوران لگائے گئے ٹیکسز پر نظر ثانی کا فیصلہ کیا ہے اور اس سیکٹر کی بحالی کے لیے جامع پلان تشکیل دے دیا گیا ہے۔اس سلسلے میں 11 رکنی ٹاسک فورس کی سفارشات وزیر اعظم شہباز شریف کو پیش کر دی گئی ہیں۔وزیر اعظم نے سفارشات پر فیصلے کے لیے 3 فروری کو اہم اجلاس طلب کر لیا ہے۔وزیر اعظم کو رہائشی گھروں کے لیے 3 منزلیں تعمیر کرنے کی اجازت دینے کی سفارش کی گئی ہے،اسی طرح پہلی مرتبہ گھر خریدنے پر ٹیکس کی مکمل چھوٹ دینے کی سفارش بھی شامل ہے جب کہ پراپرٹی کی خرید و فروخت پر عائد وفاقی اور صوبائی ٹیکسز کو ریوائز کرنے کی تجویز بھی ہے۔علاوہ ازیں پراپرٹی فروخت کرنے پر ٹیکس 4 سے کم کر کے 2 فیصد مقرر کرنے،خریدار پر ٹیکس 4 فیصد سے کم کر کے اعشاریہ 5 فیصد مقرر کرنے،پراپرٹی کی خرید وفروخت پر فیڈرل ایکسائز ڈیوٹی ختم کرنے اور ہاوسنگ کے لیے کم آمدن افراد کو ہاوسنگ سبسڈی دینے کی سفارش کی گئی ہے۔ہاوسنگ اور رئیل سٹیٹ پر ٹیکسز کو 14 فیصد سے کم کرکے 4 سے 4.5 فیصد تک لانے کی تجویز ہے۔اس کے علاوہ رئیل سٹیٹ ریگولیٹری اتھارٹی کو وزارت داخلہ کے بجائے وزارت ہاوسنگ کے تحت کرنے کی تجویز بھی شامل ہے۔ گھروں کے لیے آسان قرضہ سکیم کو بحال کرنے کی سفارش کے ساتھ ساتھ ہاوسنگ کے لیے پبلک پرائیویٹ پارٹنر شپ کو سہولت دینے کی تجویز بھی منصوبے کا حصہ ہے۔وزیر اعظم کو گھروں کی تعمیر کے لیے 5سے 20سال کی مدت کے لیے قرض دینے کی سفارش بھی کی گئی ہے۔اس سلسلے میں ہاوسنگ کے لیے قابل ٹیکس آمدن 5 کروڑ تک کرنے(ہاوسنگ کے لیے 5 کروڑ روپے تک ٹیکس کی چھوٹ دینے)کی تجویز بھی شامل ہے۔
