اسلام آباد(بیورو رپورٹ)وزیر اعظم شہباز شریف نے کہا ہے کہ 2018 تک ملک سے دہشت گردی کا خاتمہ ہو گیا تھا لیکن پچھلی حکومت نے دہشت گردوں کو ملک میں آنے دیا،دہشت گردوں کو دوبارہ بسانے سے بڑی دشمنی نہیں ہو سکتی،افواج پاکستان اور عوام نے بڑی قربانیاں دی ہیں،ملک سے ایک بار پھر دہشت گردی ختم ہو گی،بیرون ملک مقیم پاکستانی ملک کے سفیر ہیں،اوورسیزپاکستانیوں کے مسائل کو حل کرنے کے لیے ہم کوئی کسر نہیں چھوڑیں گے۔
”پاکستان ٹائم“ کے مطابق اسلام آباد میں اوورسیز پاکستانیز گلوبل فاونڈیشن کی تقریب سے خطاب کے دوران وزیر اعظم شہباز شریف کا کہنا تھا کہ تقریب کے تمام شرکا کا دل کی گہرائیوں سے شکر گزار ہوں،اوورسیز پاکستانیوں کا ملک میں خیرمقدم کرتے ہیں،اوورسیز پاکستانی دیار غیر میں شبانہ روز محنت کرتے ہیں،اوورسیز پاکستانی اپنی محنت سے ملک کا نام روشن کر رہے ہیں،بیرون ملک مقیم پاکستانی ملک کے سفیر ہیں،میں،میری حکومت اور پاکستانی عوام آپ کی عظمت کو سلام کرتے ہیں،آج آپ کی محنت کی بدولت ترسیلات بیرون ممالک سے سٹیٹ بینک کے ذریعے پاکستان آ رہی ہیں،جس میں 30 فیصد اضافہ ہوا ہے،جس سے پاکستان کا زرمبادلہ کے حوالے سے قومی خزانے کو بے پناہ فائدہ پہنچا ہے،اسی طریقے سے آپ دنیا میں بہترین تربیت حاصل کر کے پاکستان میں بطور سرمایہ کار،بطور پروفیشنل یہاں سرمایہ کاری کرتے ہیں تو اس سے ملکی معیشت کو بے پناہ فائدہ پہنچتا ہے،اسی طرح سے جب یہاں آپ جائیدادیں خریدتے ہیں تو پراپرٹی کو پر لگ جاتے ہیں۔انہوں نے یہ بھی کہا کہ آپ کے مسائل کو حل کرنے کے لیے جو میری حکومت کی ذمہ داری ہے،اس کے لیے ہم کوئی کسر نہیں چھوڑیں گے اور آپ کا حق دلوا کر ہم چین سے بیٹھیں گے،گرین چینل سابق وزیر اعظم نواز شریف ایک بہت بڑا کارنامہ تھا اور انشااللہ اس کو ہم دوبارہ بحال کریں گے،وزیرخزانہ اوورسیز پاکستانیوں کے لیے گرین چینل کے معاملے کا جائزہ لیں گے،گرین چینل کو چلانے میں آپ کا کلیدی کردار ہو گا،آپ نے اس کو گرین یا یلو میں تبدیل نہیں ہونے دینا۔
وزیر اعظم شہباز شریف نے کہا کہ 2018 تک پاکستان میں دہشت گردی کا خاتمہ ہو گیا تھا، 80 ہزار پاکستانی شہید ہوئے جس میں عام شہری بھی شامل تھے،پاکستان کی معیشت کو ناقابل تلافی نقصان پہنچا جبکہ افواج پاکستان کے دلیر افسران اور جوانوں اور ان کے خاندانوں نے قربانیاں دی جس کے بعد دہشت گردی کا مکمل خاتمہ ہو گیا تھا،بدقسمتی سے چند سال پہلے ایک حکومت نے ان کو دوبارہ پاکستان آنے دیا اور یہ کہا کہ یہ امن کے پیامبر ہیں،اس سے بڑی پاکستان دشمنی اور کوئی نہیں ہو سکتی،کل میں کوئٹہ سے ہو کر آیا ہوں اور اس سے دو دن پہلے پاکستان فوج کے سپہ سالار جنرل عاصم منیر وہاں لے گئے تھے،بلوچستان میں 23 دہشت گردوں کو جہنم واصل کیا گیا اور اس جنگ میں 18 فوجی جوان بھی شہید ہوئے،ان عظیم قربانیوں کے نتیجے میں یہ دہشت گردی دوبارہ ختم ہوگی اور دفن ہو گی،یہ دھرتی انشااللہ محفوظ ہو گی،اس کے پیچھے وردیوں میں جوانوں اور افسران کی قربانیاں ہیں جو رائیگاں نہیں جائیں گی۔
