لاہور(سٹاف رپورٹر)عدالت نے مشہور زمانہ رمضان شوگر مل کرپشن کیس میں شریف خاندان کو بڑی خوشخبری سناتے ہوئے وزیر اعظم شہباز شریف اور ان کے صاحبزادے رکن قومی اسمبلی حمزہ شہباز کو باعزت بری کر دیا ہے،وزیر اعلیٰ پنجاب مریم نواز کی کیس میں بریت پر اپنے چچا اور کزن کو مبارکباد۔
”پاکستان ٹائم“کے مطابق اینٹی کرپشن عدالت لاہور نے رمضان شوگر ملز کرپشن کیس میں شہباز شریف اور حمزہ شہباز کو بری کر دیا۔ عدالت کے جج سردار محمد اقبال ڈوگر نے تین فروری کو محفوظ کیا گیا فیصلہ سناتے ہوئے دونوں رہنماوں کو الزامات سے بری کرنے کا حکم دیا۔دوسری طرف وزیر اعلی پنجاب مریم نواز شریف نے وزیر اعظم شہباز شریف اور حمزہ شہبازشریف کی بریت پر اظہار تشکر کرتے ہوئے اپنے چچا اور کزن کو مبارکباد پیش کی اور نیک تمناوں کا اظہار کرتے ہوئے کہا کہ اس کیس میں اللہ تعالی نے سرخرو کیا،شکر بجا لاتے ہیں۔یاد رہے کہ 18 فروری 2019 کو نیب نے شہباز شریف اور ان کے بیٹے حمزہ شہباز کے خلاف رمضان شوگر ملز کیس میں ریفرنس دائر کیا تھا،شہباز شریف اور حمزہ شہباز پر شوگر ملز کے لیے گندے نالے کو 21 کروڑ روپے سے قومی خزانے کے ذریعے تعمیر کروانے کا الزام عائد کیا گیا تھا۔تین فروری کو شہباز شریف اورحمزہ شہباز کے وکیل امجد پرویز نے حتمی دلائل دیتے ہوئے کہا تھا کہ پنجاب اسمبلی نے سال 2014-15 کے ترقیاتی منصوبے میں نالے کی تعمیر کی منظوری دی تھی،یہ نالہ اس وقت کے ممبر صوبائی اسمبلی مولانا رحمت اللہ کی درخواست پر بنایا گیا اور اس میں حمزہ شہباز کا کوئی کردار نہیں تھا۔انہوں نے کہا کہ بجٹ کی منظوری کے بعد اس کے لیے فنڈز جاری کیے گئے اور اس نالے کو 10 گاوں استعمال کر رہے ہیں،وکیل نے بتایا کہ نیسپاک کی رپورٹ کے مطابق رمضان شوگر مل کا پانی گندے نالے میں زیادہ گرتا ہے،جبکہ باقی علاقوں کا پانی کم ہے۔پراسیکیوشن کے مطابق سرکاری انجینئر نے رپورٹ دی کہ نالے کی تعمیر میں ناقص میٹریل استعمال کیا گیا اور اس کا بنیادی مقصد رمضان شوگر ملز کو فائدہ پہنچانا تھا۔وکیل صفائی نے کہا کہ یہ کیس سیاسی بنیادوں پر بنایا گیا ہے، اس میں گواہوں کو طلب کرنے کی ضرورت نہیں۔عدالت نے دلائل مکمل ہونے کے بعد فیصلہ محفوظ کر لیا تھا جبکہ 28 جنوری کو مقدمہ کے مدعی ذوالفقار علی نے ریفرنس سے اظہار لا تعلقی کیا تھا۔
