راولپنڈی(بیورو رپورٹ)پاکستان تحریک انصاف(پی ٹی آئی)کے بانی چیئرمین عمران خان کے وکیل اور سابق وفاقی وزیر اطلاعات فواد چوہدری کے بھائی فیصل چوہدری کو پولیس سے تکرار اور گالیاں دینے کی ویڈیو وائرل ہونے کے بعد اڈیالہ جیل کے باہر سے گرفتار کر کے نامعلوم مقام پر منتقل کر دیا گیا ہے۔
”پاکستان ٹائم“کے مطابق سابق وزیر اعظم عمران خان کے وکیل فیصل چوہدری کو اڈیالہ جیل کے باہر سے گرفتار کر لیا گیا،وہ بانی پی ٹی آئی سے ملاقات کے لیے آئے تھے،فیصل چوہدری کو اڈیالہ جیل کے گیٹ نمبر 5 سے تحویل میں لیا گیا۔اپنی گرفتاری سے قبل فیصل چودھری ایڈووکیٹ نے اڈیالہ جیل کے باہر گفتگو کرتے ہوئے کہا کہ میرے ساتھ جو کل ہوا وہ اندرونی گیٹ پر ہوا،اس پر آج نوٹس ہو گیا ہے،عدالتی احکامات جیل سپرنٹنڈنٹ کو واٹس ایپ پر بجھوا دیے تھے،چھپے ہوئے چلمن سے لگے ہوئے ہیں جنہوں نے میری ویڈیو ریلیز کی،میرا قصور یہ ہے کہ میں عمران خان کی گفتگو باہر بیان کرتا ہوں۔واضح رہے کہ گزشتہ روز فیصل چوہدری ایڈووکیٹ کو اڈیالہ جیل میں داخلہ سے روک دیا گیا تھا۔جیل کے داخلی گیٹ پر فیصل چوہدری اور جیل عملے کے مابین تلخ کلامی ہوئی تھی،دو گھنٹے تک ڈپٹی سپرنٹنڈنٹ کے کمرے میں بٹھا کر فیصل چوہدری کو واپس جانے کا کہہ دیا گیا تھا جس پر وہ کافی مشتعل دکھائی دیئے اور گیٹ پر تعینات باوردی پولیس اہلکار کو گالیاں دیتے رہے۔اس واقعہ کی ویڈیو سوشل میڈیا پر وائرل ہو گئی تھی۔گذشتہ روز ہی فیصل چوہدری ایڈووکیٹ نے اڈیالہ جیل چوکی میں جیل انتظامیہ کے خلاف مقدمہ درج کرنے کی درخواست دے دی تھی جس میں موقف اپنایا تھا کہ میں عمران خان کا وکیل ہوں،ان کے تمام مقدمات میں پیش ہوتا ہوں،عمران خان کے تمام کیسز میں میرا وکالت نامہ جمع ہے،جیل عملے نے آج داخلی دروازے پر روک دیا اور اندر جانے کی اجازت نہیں دی،انسداد دہشت گردی عدالت نے جی ایچ کیو کیس کی سماعت مقرر کی تھی،داخلی گیٹ پر جیل عملے نے بتایا کہ آج آپ کو اندر جانے اجازت نہیں،احتجاج کرنے پر مجھے ڈپٹی سپرنٹنڈنٹ جیل کے کمرے میں 2 گھنٹے تک حبس بیجا میں رکھا گیا،جیل عملہ پورا وقت میرے اور میرے ساتھ آئے سائلین کو ہراساں کرتا رہا،درخواست ہے کہ ملزمان کے خلاف قانونی کارروائی کی جائے۔
