لاہور(خصوصی رپورٹر)وفاقی وزیر اطلاعات اور پاکستان مسلم لیگ ن کے مرکزی رہنما عطاء اللہ تارڑ نے”فتویٰ“دیتے ہوئے اپوزیشن کی سب سے بڑی جماعت پاکستان تحریک انصاف(پی ٹی آئی)کو پاکستان مخالف قرار دے دیا۔
”پاکستان ٹائم“کے مطابق وفاقی وزیر اطلاعات عطاء اللہ تارڑ نے جلسے سے خطاب کرتے ہوئے کہا کہ پی ٹی آئی والے ہمارے نہیں بلکہ پاکستان کے مخالف ہیں،تحریک انصاف والے کہتے تھے ملک ڈیفالٹ ہو جائے گا لیکن اب دنیا کے مالیاتی ادارے اس بات کا اعتراف کر رہے ہیں کہ مہنگائی کم ہوئی ہے،سٹاک مارکیٹ اوپر گئی اور آئی ٹی برآمدات میں اضافہ ہوا ہے،پی ٹی آئی والے ہمارے نہیں بلکہ پاکستان کے مخالف ہیں،یہ شرطیں لگاتے تھے کہ ملک ڈیفالٹ ہو جائے گا لیکن اب پاکستان کا شمار دنیا کی بہترین معیشتوں میں ہونا شروع ہو گیا ہے اور ہماری سٹاک مارکیٹ دنیا کی بہترین سٹاک مارکیٹوں میں سے ایک ہے،ملک میں مہنگائی کی شرح کم ہوئی ہے اور معیشت کے اشارے مثبت ہیں۔
عطا اللہ تارڑ نے کہا کہ پی ٹی آئی میں پھوٹ پڑ چکی ہے اور یہ آپس میں دست و گریباں ہیں،ان لوگوں کی آپس کی لڑائی میں خیبر پختونخوا کا براحال ہو چکا ہے لیکن یہ لوگ روتے رہیں گے اور ہم عوام کی خدمت کرتے رہیں گے،پی ٹی آئی والوں کے پاس خیبر پختونخوا میں کارکردگی دکھانے کے لیے کچھ نہیں ہے،لاہور میں کہتے ہیں کہ دھاندلی ہوئی تو کیا پشاور میں دھاندلی نہیں ہوئی؟یہ کیسا انتخاب تھا جہاں ہار جاو وہاں کہو دھاندلی اور جہاں جیت جاو وہاں کہو میرٹ پر جیتے ہیں،تم لوگوں کو جھوٹ بھی ڈھنگ سے بولنا نہیں آتا،یہ لوگ صرف اس بات پر آج پریشان ہیں کہ پاکستان ترقی کیسے کر گیا؟تمہاری پرفارمنس صفر سے بھی نیچے ہے،چیف الیکشن کمشنر ایک نیک نام افسر ہے جن کا نام پی ٹی آئی نے دیا تھا۔انہوں نے کہا کہ آج مسلم لیگ ن کی حکومت کو ایک سال ہو گیا اور ہم عوام سے کیے وعدے پورے کر رہے ہیں،حلقے کے عوام کے لیے بڑھ چڑھ کر کام کر رہے ہیں،آپ سے وعدہ کیا تھا کہ ووٹ لینے کے بعد غائب نہیں بلکہ آپ کے درمیان رہوں گا اور اس حلقے کے عوام کو مزید سہولیات فراہم کریں گے، 5 سال میں اس حلقے کی تقدیر بدل جائے گی۔وفاقی وزیر اطلاعات نے کہا کہ تعمیر وترقی کے سفر میں شہباز شریف اور پوری ٹیم کی کاوش شامل ہے اور آرمی چیف نے حب الوطنی کے ساتھ معاشی سفر میں پورا کردار ادا کیا،آرمی چیف پاکستان کو ترقی کی منزلوں کی طرف لے کر گئے،یہ ایک ٹیم ورک ہے جس میں شہباز شریف کو بھرپور سپورٹ حاصل رہی اور ہمیں سکھایا گیا تھا کہ جو سرحدوں کا محافظ ہے وہ عزت کے لائق ہے،دھاندلی کا جھوٹا رونا ہے لیکن اس کے ثبوت کہاں ہیں؟عوام نے پی ٹی آئی کی جھوٹ کی سیاست کو مسترد کر دیا ہے، پی ٹی آئی نے 4 سال کھوکھلے نعروں کی بنیاد پر حکومت چلائی۔
