لاہور(سٹاف رپورٹر)پاکستان تحریک انصاف(پی ٹی آئی)کے مرکزی رہنما شاہ محمود قریشی نے کہا ہے کہ پی ٹی آئی کو کسی ڈیل کی ضرورت نہیں،وہ عدالتوں کا سامنا کریں گے اور بے گناہی ثابت کر کے سرخرو ہوں گے،ماضی میں کبھی ایسا نہیں ہوا کہ آئی ایم ایف کا وفد چیف جسٹس سے بریفنگ لے،آئی ایم ایف کی بریفنگ سے واضح ہوتا ہے کہ ملک میں قانون کی حکمرانی کس نہج پر ہے۔
”پاکستان ٹائم“کے مطابق انسداد دہشت گردی عدالت کے باہر میڈیا سے گفتگو کرتے ہوئے شاہ محمود قریشی کا کہنا تھا کہ تمام بڑی جماعتیں ہمارے موقف کی تائید کررہی ہیں،بہت جلد گرینڈ الائنس بننے جا رہا ہے،شاہد خاقان عباسی اپنی حکومت سے لا تعلق ہو گئے اور ہمارے ساتھ کھڑے ہوئے،مفتاح اسماعیل،محمود خان اچکزئی اور مولانا فضل الرحمن بھی ہمارے موقف کے ساتھ کھڑے ہیں۔انہوں نے ملتان میں اپنی بیٹی کی گرفتاری کو بھی امتیازی سلوک قرار دیتے ہوئے کہا کہ عوام سب کچھ دیکھ رہے ہیں،حالات بدل چکے ہیں لیکن حکومت ہٹ دھرمی پر اتر آئی ہے،صوابی میں جلسے کے باوجود دفعہ 144 نافذ کر دی گئی جبکہ عطاء تارڑ کا جلسہ بغیر کسی رکاوٹ کے منعقد ہوا،موجودہ صورت حال میں شہباز شریف اور حمزہ شہباز تمام مقدمات سے بری ہو جائیں گے جبکہ وہ حلفیہ کہتے ہیں کہ 9 مئی کے کیسز میں وہ بے قصور ہیں۔شاہ محمود قریشی نے کہا کہ دو جج صاحبان نے کہا کہ پہلے فیصلہ ہونے دیں،اگر 26ویں ترمیم کی درخواستوں کا انتظار کر لیا جاتا تو زیادہ بہتر ہوتا،اب بلاوجہ ایک نیا تنازع کھڑا ہو گیا ہے،عمران خان نے اپنے خط میں 6 نکات پیش کیے جو مثبت تجاویز پر مبنی تھے اور انہیں عالمی سطح پر پذیرائی بھی ملی لیکن حکومت کی جانب سے کوئی جواب نہیں دیا گیا۔انہوں نے واضح کیا کہ پی ٹی آئی کو کسی ڈیل کی ضرورت نہیں،وہ عدالتوں کا سامنا کریں گے اور بے گناہی ثابت کرکے سرخرو ہوں گے۔
