اسلام آباد(بیورو رپورٹ)پاکستانی شہریوں کے لئے بڑی خوشخبری،16 فروری سے پیٹرولیم مصنوعات کی قیمتوں میں بڑی کمی متوقع،پیٹرولیم مصنوعات 9 روپے تک سستی ہونے کا امکان ہے۔
”پاکستان ٹائم“کے مطابق عالمی مارکیٹ کے زیر اثر 16 فروری سے ملک میں پیٹرولیم مصنوعات کی قیمتوں میں بڑی کمی ہونے جارہی ہے،پیٹرولیم مصنوعات 9 روپے تک سستی ہونے کا امکان ہے،ہائی سپیڈ ڈیل کی قیمت میں 9 روپے 11 پیسے فی لیٹر جبکہ پیٹرول کی فی لیٹر قیمت میں 2 روپے 50 پیسے فی لیٹرکمی کا امکان ہے۔اس کے علاوہ مٹی کا تیل 3 روپے 45 پیسے فی لیٹر جبکہ لائٹ ڈیزل 5 روپے 60 پیسے فی لیٹر تک سستا ہو سکتا ہے۔قیمتوں میں کمی عالمی مارکیٹ میں خام تیل کی قیمتوں کے تناسب سے ہوگی،انڈسٹری نے پیٹرولیم مصنوعات سے متعلق ورکنگ اوگرا کو بھجوادی۔اوگرا عالمی مارکیٹ کے تناسب سے حتمی ورکنگ 15 فروری کو حکومت کو بھجوائے گا،وزیر اعظم شہباز شریف پیٹرولیم قیمتوں سے متعلق حتمی منظوری دیں گے۔وزارت خزانہ آئندہ 15 روز کے لیے قیمتوں کا نوٹیفکیشن جاری کرے گی۔
