راولپنڈی(بیورو رپورٹ)پاکستان تحریک انصاف(پی ٹی آئی )کے رہنما اور معروف قانون دان بیرسٹر شعیب شاہین نے اڈیالہ جیل میں سابق وفاقی وزیر فواد چوہدری سے ہونے والی لڑائی اور بانی چیئرمین عمران خان کے کہنے پر صلح کی خبروں اور فوادچوہدری کے دعووں کو مسترد کرتے ہوئے سابق وفاقی وزیر بارے ایسی شعلہ فشانی کی ہے کہ فواد چوہدری آگ بگولہ ہو جائیں گے۔
”پاکستان ٹائم “کے مطابق اڈیالہ جیل کے باہر میڈیا سے گفتگو کرتے ہوئے ایڈووکیٹ شعیب شاہین نے کہا کہ فواد چوہدری بھگوڑا ہے،مجھے تھپڑ مارا،اس سے زیادہ جواب مل گیا اس کو،یہ اسٹیبلشمنٹ کا ٹاوٹ ہے،عمران خان نے اس جھگڑے کی مذمت کی ہے۔انہوں نے فواد چوہدری کا صلح کا دعویٰ مسترد کرتے ہوئے کہا کہ وہ جھوٹ بول کر گیا ہے،اس سے کوئی صلح نہیں ہوئی،میں فواد چوہدری کے خلاف کوئی شکایت پولیس کو نہ ہی پارٹی کو کروں گا،میں فواد چوہدری کو کبھی معاف نہیں کروں گا۔انہوں نے کہا کہ فواد چوہدری کا ہماری پارٹی سے کوئی تعلق نہیں،وہ اسٹیبلشمنٹ کا ٹاوٹ ہے،اس کی معاشرے میں کوئی عزت نہیں،فواد چوہدری کو اس کی حرکت سے بڑھ کر جواب دیا ہے،فواد چوہدری ہماری پارٹی میں دراڑیں ڈالنے کی کوشش کر رہا ہے،میرا کوئی راضی نامہ نہیں ہوا فواد چوہدری سے،وہ پلاننگ کر کے آیا تھا،جس کے تحت اس نے مجھ پر حملہ کیا ہے،میں اس کےخلاف قانونی کارروائی نہیں کروں گا،میں اس کو جواب دوں گا۔
شعیب شاہین نے کہا کہ عزت اس کی خراب ہوتی ہے جس کی کوئی عزت ہو،جو بے عزت آدمی ہو اس کی کیا عزت ہو گی؟اس نے جیل آتے ہی میرے اوپر حملہ کیا،مجھے تو پتا ہی نہیں تھا کہ وہ حملہ کرے گا،اس کے بعد ہم نے 4 گنا زائد حساب برابر کر دیا لیکن اس بے عزت آدمی کو 4 گنا زیادہ بھی کر دیں اس کی کیا بے عزتی ہونی ہے؟یہ زندگی بھر ٹاوٹ رہا ہے،کس طرح مال کمایا ہے؟کس طرح عمران خان کا نام مس یوز کیا ہے؟اس کو یہی تکلیف ہے کہ عمران خان کا پیغام قوم کو دیا اور بتایا کہ اس کا پارٹی سے کوئی تعلق نہیں ہے،یہ پارٹی اور سلمان اکرم راجا کے خلاف ابھی بھی بولتا ہے،یہ اپنے چچا کے نام پر پیسے پکڑتا تھا جس کا حامد خان نے اپنی کتاب میں بھی ذکر کیا،یہ سول ججز کی ٹرانسفر کے بھی پیسے پکڑتا تھا،ہماری کسی قسم کی کوئی صلح نہیں اور اس ٹاوٹ سے کبھی صلح نہیں کروں گا،پہلی بات ہے کہ میں ایف آئی ار کا قائل نہیں ہوں،ہم نے اس کو زیادہ مارا ہے۔
انہوں نے کہا کہ میں لعنت بھیجتا ہوں،ایسے دو نمبر لوگوں کے خلاف کیا ایف آئی آر کٹاوں؟ہم نے جب بدلہ لینا ہو گا اتنی طاقت ہے کہ اس سے براہ راست بدلہ لیں گے،جو بندہ پارٹی میں نہیں اس کے خلاف عمران خان کیا ایکشن لیں گے؟آپ کو یاد ہے یہ اسلام آباد ہائی کورٹ سے بھاگا تھا،میرے دفتر میں مجھے گرفتار کرنے آئے تھے تو میں آرام سے چلا گیا تھا،آج پولیس گرفتار کرے،سب سے پہلے چلا جاوں گا،اس کو اندازہ نہیں تھا کہ اس کو بھی مارا جائے گا،پھر بھاگا کیسے؟اس کی بیوی آ گئی اور چھڑوا لیا نہیں تو ہم نے زیادہ مارنا تھا۔شعیب شاہین ایڈووکیٹ نے کہا کہ فواد جھوٹ بولتا ہے،عمران خان نے اس کا ساتھ نہیں دیا،کوئی جھگڑا ختم نہیں کرایا،نہ میں نے اس ٹاوٹ کے ساتھ ساری زندگی صلح کرنی ہے،میں نے عمران خان کو پوری بات بتائی اور کہا کہ ہم نے چار گنا حساب برابر کر لیا ہے،عمران خان نے کہا اس کا پارٹی سے کوئی تعلق نہیں اور اس کی مذمت کی ہے،ہم عمران خان کے کاز کے ساتھ کھڑے ہیں اور کھڑے رہیں گے۔شعیب شاہین کا کہنا تھا کہ آج عمران خان سے ملاقات ہوئی ہے،پاکستان میں غیر اعلانیہ مارشل لا ہے،ملک میں نظام انصاف ختم ہو چکا ہے،26ویں آئینی ترمیم کے بعد عوام کی امید ختم ہوچکی ہے،عوام اور فوج کے درمیان خلیج کی وجہ اسٹیبلشمنٹ ہے،عوام میں مایوسی پھیلتی جا رہی ہے۔
