جہلم(بیورو رپورٹ)سابق وفاقی وزیر چوہدری فواد حسین نے پاکستان تحریک انصاف(پی ٹی آئی)کی قیادت پر کڑی تنقید کرتے ہوئے کہا ہے کہ پارٹی کی موجودہ قیادت عمران خان کی رہائی میں مکمل ناکام ہو چکی ہے،اس قیادت کی موجودگی میں عمران خان کی رہائی کا کوئی امکان نہیں،پی ٹی آئی کی موجود لیڈر شپ اسٹیبلشمنٹ نے انسٹال کی ہے،تحریک انصاف کو گرینڈ الائنس نہیں بنانے دیا گیا جس کی ذمہ دار موجودہ قیادت ہے،میں عمران خان کی رہائی کیلیے ریلیز کمیٹی بناوں گا۔
”پاکستان ٹائم“کے مطابق فواد چوہدری نے تحریک انصاف کی قیادت کو آڑے ہاتھوں لیتے ہوئے کہا کہ سلمان اکرم راجہ، شیخ قاص اکرم اور روف حسن کی عمران خان سے ہمدردیاں نہیں ہیں،بانی پی ٹی آئی کو جیل میں 600 دن ہو چکے ہیں،موجودہ قیادت عمران خان کی رہائی میں مکمل ناکام ہو چکی،عمران خان کے تمام کیسز ایک بار پھر ملتوی کر دیے گئے ہیں،قبل ازیں کیسز ملتوی ہونے پر عمران خان کو 20 دن ڈیتھ سیل میں رکھا گیا تھا اور انہیں بدترین قید تنہائی کا سامنا کرنا پڑا تھا،ایک بار پھر کیسز ملتوی کر کے وکلا اور فیملی سے ان کی ملاقاتیں بند کر دی گئی ہیں،ہمیں ڈر ہے کہ عمران خان کو بدترین انتقام کا نشانہ بنایا جائے گا،آج قید تنہائی میں پی ٹی آئی قیادت کو عمران خان سے ملاقات کرنی چاہیے تھی،عمران خان کی رہائی کے لئے حکومت اور اسٹیبلشمینٹ کی طرح موجودہ قیادت بھی حق میں نہیں ہے،اسی لئے میں نے پی ٹی آئی کی تمام پرانی قیادت کو اکٹھا کرنے کا فیصلہ کیا ہے اور عمران خان ریلیز کمیٹی بنانے کے لئے رابطے شروع کر دیے ہیں،عمران خان کی رہائی کےلیے قانونی اور سیاسی جدوجہد کا آغاز کر رہیے ہیں،ملک میں سیاسی استحکام لانے کی واحد صورت عمران خان کی رہائی ہے،عمران خان کی جیل میں طویل قید سے پاکستان تقسیم ہو چکا ہے،جب تک عمران خان کی سیاسی حقیقت کو تسلیم نہیں کیا جاتا سیاسی عدم استحکام رہے گا۔
انہوں نے تحریک انصاف کی قیادت پر کڑی تنقید کرتے ہوئے کہا کہ پی ٹی آئی کی موجودہ لیڈر شپ عمران خان کی رہائی کیلیے فکرمند نظر نہیں آ رہی،سلمان اکرم راجہ پانامہ کیس میں نواز شریف کے معاون رہے اور ان کی دلچسپی صرف پیسہ کا حصول ہے،وکلا ٹیم اور میڈیا ٹیم کی فنڈنگ کا کبھی آڈٹ نہیں کرایا گیا،لیگل ٹیم کے ہیڈ سلمان راجہ اور میڈیا ٹیم کے ہیڈ شیخ وقاص اکرم ہیں،مجھ سمیت پرانی تمام لیڈر شپ کو ٹھڈے مار کر جیلوں میں ڈالا گیا،میرے خلاف صوبے بھر میں 48 کیسز بنائے گئے جبکہ پی ٹی آئی کی موجودہ لیڈر شپ پر ایک بھی کیس نہیں،میں ڈھائی سال سے ای سی ایل پر ہوں اور موجودہ پی ٹی آئی قیادت فنڈنگ کے لیے آئے روز غیر ملکی دورے پر چلی جاتی ہے،شیخ وقاص اکرم اور ان کی فیملی پچھلے کئی ماہ سے کے پی ہاوس میں رہائش پذیر ہے،شیخ وقاص اکرم پر سنگین الزامات عائد ہیں بچنے کے لیے کے پی ہاوس میں مقیم ہیں،حامد خان گروپ،شعیب شاہین،سلمان اکرم راجہ پر فنڈنگ کے سنگین الزامات ہیں،موجودہ پی ٹی آئی قیادت کا حکومت اور اسٹیبلشمنٹ سے رابطہ بالکل واضح ہے،موجودہ قیادت کے ہوتے عمران خان کی رہائی کے امکانات بالکل نہیں ہیں۔فواد چوہدری نے کہا کہ سیاست دان اپنا بیانیہ عوام کے سامنے رکھتے
ہیں یہی لیٹر میں لکھا گیا ہے،عمران خان اور تحریک انصاف کی قیادت پر ہونے والے ظلم کو ہی لیٹر کے ذریعے عیاں کیا جا رہا ہے،تین سال میں عمران خان کا سیاسی حل نکال لیتے تو ملکی حالات بہتر ہو جاتے، 33 فیصد ٹیکسٹائل ملز بند ہونے سے معیشت بیٹھ چکی،امپورٹ پر پابندی کی وجہ سے ڈالر مستحکم نظر آ رہا جبکہ ملک میں مکمل طور پر جعلی اکانومی چلائی جا رہی ہے۔
