لاہور(وقائع نگار خصوصی)وزیر اعلیٰ پنجاب مریم نواز نے”آسان کاروبار“پروگرام کا اجرا کرتے ہوئے کہا کہ مخالفین کی سیاست ایک دوسرے کو تھپڑ مارنے تک آ گئی،عوام نے فتنہ فساد کی سیاست کو مسترد کر دیا،نالائق حکمرانوں نے مہنگائی کی شرح 38 فیصد تک پہنچا دی تھی،ہم نے مہنگائی کے جن کو قابو کیا،کوئی اڈیالہ جیل میں اچھا کھانا کھا رہا ہے تو مجھے اعتراض نہیں،حالات نے کیسا پلٹا کھایا کہ وہ شخص آج میرے پاس اڈیالہ میں بند ہے،میں نے نہیں کہا اسے پکڑو یا چھوڑو بلکہ قانون نے اپنا راستہ خود اپنایا ہوا ہے،میرے یونیورسٹی پرواگرمز کے بارے میں کہا گیا کہ وہ تیار شدہ ہوتے ہیں،تنقید کرنے والے میرے ساتھ یونیورسٹیز جا کر دیکھ لیں،کہا جا رہا ہے کہ عمران خان بہت پاپولر ہیں، نوجوان میرے ساتھ ہیں۔
”پاکستان ٹائم“کے مطابق وزیر اعلیٰ پنجاب مریم نواز کی” آسان کاروبار فنانس“اور”آسان کاروبار کارڈ“تقسیم کرنے کی تقریب میں آمد ہوئی،جہاں انہوں نے”آسان کاروبار فنانس“کے چیک اور آسان کاروبار کارڈ تقسیم کیے۔فیصل آباد کے آصف کو فارما سوٹیکل کے کاروبار کے لیے 3 کروڑ قرض کا چیک ملا،راولپنڈی کے وجاہت فرید کو سافٹ ویئر ہاوس کے لیے 3 کروڑ قرض کا چیک ملا،لاہور کے ارشد کو سپورٹس ایکسپورٹ کے لیے 3 کروڑ قرض کا چیک دیا گیا۔ساہیوال کے علی آصف کو فرنیچر کے لیے 50 لاکھ روپے قرض کا چیک ملا،افضل کو ٹرانسپورٹ بزنس کے لیے 31 لاکھ 75 ہزار قرض ملا،لاہور کے شبیر کو ہیر سیلون اور کاسمیٹک بزنس کے لیے 50 لاکھ قرض کا چیک ملا،اس کے علاوہ فیضان ممتاز کو گارمنٹس بزنس کے لیے 57 لاکھ 50 ہزار کا آسان بزنس کارڈ ملا،ابو بکر صالح کو پیپر مینو فیکچرنگ کے لیے 10 لاکھ کا آسان بزنس کارڈ دیا گیا، چوہدری ذوالفقار علی کو بیکری بزنس کے لیے 10 لاکھ کا آسان بزنس کارڈ دیا گیا۔
وزیر اعلیٰ پنجاب نے کاروبار شروع کرنے والوں کے لیے کامیابی کی دعا،آسان کاروبار فنانس اور کارڈ کے بارے میں پراجیکٹ ڈاکو مینٹری بھی دکھائی گئی۔اس موقع پر بریفنگ میں بتایا گیا کہ آسان کاروبار کارڈ کے ذریعے 10 لاکھ روپے تک قرض حاصل کیا جا سکتا ہے،آسان کاروبار فنانس کے تحت 10 لاکھ سے تین کروڑ تک قرض حاصل کیا جا سکتا ہے، آسان کاروبار کے تحت قرض کی ادائیگی آسان قسطوں میں کی جائے گی،قرض حاصل کرنے والوں کو سود ادا نہیں کرنا پڑے گا،آسان کاروبار فنانس کے تحت 36 ارب کے قرضےدئیےجائیں گے،آسان کاروبار کارڈ سکیم کے تحت 48 ارب روپے کے بلا سود قرضے دئیے جا رہے ہیں،پنجاب کے 21 سال سے 57 سال تک کے شہری قرض کے لئے اپلائی کر سکتے ہیں۔اس موقع پر وزیر اعلیٰ پنجاب مریم نواز نے آسان کاروبار پروگرام کا اجرا کیا اور تقریب سے خطاب کرتے ہوئے کہا کہ آسان کاروبار کارڈ کے تحت بلاسود 10 لاکھ سے 3 کروڑ روپے تک قرضے دیے جا رہے ہیں،پروگرام کے تحت ملنے والے قرضے کی 3 سال میں آسان اقساط پر واپسی ہو گی”آسان کاروبار“کے تحت چیک وصول کرنے والوں کو مبارکباد دیتی ہوں،نواز شریف کی بیٹی نے آج ایک اور وعدہ پورا کر دیا،سکیم کامیاب ہونے کے بعد ہی اس کا اجرا کر رہی ہوں، 17 جنوری کو پروگرام لانچ کیا،ایک ماہ کے اندر اس کا اجرا کر دیا،”آسان کاروبار“پروگرام کا آسان سوالنامے سے اجرا کیا گیا۔
وزیر اعلیٰ پنجاب نے کہا کہ پنجاب بینک نے بہت بہترین انداز میں سکیم کو لانچ کیا،آسان کاروبار پرگرام سے روزگار کے مواقع پیدا ہوں گے،بیمار معیشت کو درست کیا جو گزشتہ ایک سال سے استحکام کی جانب گامزن ہے،منہگائی کی شرح 4 فیصد تک لے آئے ہیں،معاشی اشاریے بہتر ہو رہے ہیں،میری حکومت عوام سے کیے وعدے پورے کر رہی ہے،سکیم پر عملدرآمد سے لوگوں کے گھروں میں آسودگی آئے گی۔ان کا کہنا تھا کہ پاکستان کی معیشت اڑان کے لیے تیار ہے،جلاو گھیراو کی کال پر کوئی بھی باہر نہیں نکلا،لوگ جلاو گھیراو سے تنگ آ چکے ہیں،عوام نے فتنہ فساد کی سیاست کو مسترد کر دیا ہے،نالائق حکمرانوں نے مہنگائی کی شرح 38 فیصد تک پہنچائی،نا اہلی کے باعث معیشت کو گزشتہ 4 سال میں ڈبو دیا گیا،پاکستان کا تشخص دنیا بھر میں خراب کیا گیا،پنجاب کے عوام نے تمام کالز کو مسترد کر دیا، مہنگائی کے جن کو قابو کیا ہے،روٹی کی قیمت کم ہو چکی ہے،پورے پنجاب میں 700 سڑکیں تعمیر ہو رہی ہیں،آگ لگانے اور جلاو گھیراو سے قومیں ترقی نہیں کرتیں،مخالفین کو پنجاب کی ترقی ہضم نہیں ہو رہی،مخالف جماعت میں ایک دوسرے پر تھپڑ مارنے کی نوبت آ گئی ہے۔
وزیر اعلیٰ پنجاب کا کہنا تھا کہ پنجاب کے ہر گاوں ہر شہر کی گلی میں عوام کو سہولت فراہم کر رہے ہیں،سوشل میڈیا پر مثبت انداز میں حکومت پنجاب کے کاموں پر گفتگو ہو رہی ہے،تنقید کرنے والے زمینی حقائق کا ادراک کریں،اپنا گھر سکیم کے تحت لوگوں کو آسان اقساط پر قرض فراہم کیا جارہا ہے،غریب اور نادار افراد کو مفت پلاٹ فراہم کریں گے،پالیسی ریٹ میں مسلسل کمی ترقی کی نشانی ہے،پالیسی ریٹ میں کمی سے کاروباری صورتحال بہتر ہو رہی ہے، حکومت روزگار کے لیے مفت زمین فراہم کرے گی،سیکٹر وائز بزنس پلان پر عمل درآمد کریں گے،کاروبار کے لیے وصولی درخواستوں پر فوری علمدرآمد کا حکم دیا ہے۔
