لاہور( ایجوکیشن رپورٹر)یونیورسٹی آف انجیرنگ اینڈ ٹیکنالوجی ٹیچنگ سٹاف ایسوسی ایشن کے زیر اہتمام کشمیر ایشو اور بین الاقوامی برادری کی ذمہ داری کے موضوع پر سیمینار کا انعقاد کیا گیا جس کی صدارت وائس چانسلر ڈاکٹر شاہد منیر نے کی،بھارت میں اسیر حریت رہنما یاسین ملک کی اہلیہ اور پیس اینڈ کلچر آرگنائزیشن کی چیئرپرسن مشعال حسین ملک نے مہمان خصوصی کی حیثیت سے شرکت کی۔
پاکستان ٹائم کے مطابق سیمینار سے خطاب کرتے ہوئے مشعال ملک نے کہا کہ فلسطین سے زیادہ ظلم کشمیر میں ہو رہا ہے،دنیا میں عوام کی طاقت فلسطینیوں کے ساتھ ہے،کشمیر میں اتنی ہی شہادتیں ہوئی ہیں،اس کو سامنے نہیں لایا جا سکا،پاکستان میں ساری دہشت گردی کے پیچھے را اور آر ایس ایس کا ہاتھ ہے۔10 لاکھ فوج کا مقابلہ روزانہ کشمیری کر رہے ہیں،کیا کشمیریوں کی آواز اتنی کمزور ہے؟۔انہوں نے اقوام متحدہ کی ناکامی پر سوال اٹھاتے ہوئے کہا کہ وہ آج تک بھارت کو کٹہرے میں کیوں نہ لا سکا؟کشمیر میں قید معصوم افراد کو فوری طور پر رہا کیا جائے،میری والدہ پہلی عورت ہے جس نے کشمیر کے جہاد میں اپنی بیٹی دی،اپنی بیٹی رضیہ سلطانہ کو بھی اس تحریک کے لیے تیار کر رہے ہیں،بھارت سے پانچ دریا آتے ہیں،اس پانی میں کس کا خون رنگا ہوا ہے؟آپ کے پانی کے پیچھے کس قوم کی قربانی ہے؟پچاس سال سے زیادہ پاکستان نے بھارتی حکومتوں کی رنگ بازیاں دیکھی ہیں،عوام اور نوجوان ہمارے ساتھ کھڑے ہوں، فلسطین کے لئے پوری دنیا نکل آئی ہے،کشمیر کے لئے نہ نکلے تو پھر اللہ کا عذاب کا انتظار کریں۔مشعال حسین ملک نے کہا کہ بھارت حریت کے رہنماوں کو باہر جانے نہیں دیتا،پاکستان کی سلامتی کے لئے کشمیریوں کا خون بھی شامل ہے، دنیا کو کشمیری عوام کی قربانیوں کا احساس کرنا چاہئے،آر ایس ایس اور بھارت کشمیریوں کی نسل کشی کر رہا،دنیا کو کشمیری عوام کی قربانیوں کا احساس کرنا چاہئے،بھارت کشمیریوں پرسات دہائیوں سے مظالم ڈھا رہا ہے،بھارت سے آنے والے دریاوں میں کشمیری شہدا کا خون شامل ہے۔
وائس چانسلر یو ای ٹی ڈاکٹر شاہد منیر نے سمینار سے خطاب کرتے ہوئے کہا کہ دنیا کی کوئی طاقت انسانی عزم کو شکست نہیں دے سکتی،کشمیر تقسیم ہندوستان کا نامکمل ایجنڈا ہے،پاکستان سے ریڈ کلف اور ماونٹ بیٹن نے زیادتی کی،کشمیر کی عوام نے ہمیشہ طاقت کے قانون کو شکست دی ہے،ہندوستان نے عالمی برادری سے وعدہ کر رکھا ہے کہ وہ کشمیریوں کو حق خود اختیاری دیا جائے گا،مودی نے مسلمانوں کی زندگی اجیرن بنا رکھی ہے۔سیمینار سے ملک ظفر اقبال سندھو،سبین ملک،ٹی ایس اے کے صدر ڈاکٹر شعیب اور جنرل سیکرٹری ڈاکٹر تنویر قاسم نے بھی خطاب کیا۔سیمینار میں اساتذہ طلبہ و طالبات کی بڑی تعداد نے شرکت کی۔سیمینار کے اختتام پر وائس چانسلر نے مشعال ملک کو یادگاری شیلڈ پیش کی۔سیمینار میں مشعال ملک کی والدہ کے لیے دعائے مغفرت بھی کی گئی۔
