کراچی(عبداللہ فاروقی سے)آئی سی سی چیمپئنز ٹرافی 2025 کے افتتاحی میچ میں دفاعی چیمپئن پاکستان اپنے پہلے امتحان میں ناکام ہو گیا،نیوزی لینڈ نے قومی ٹیم کو 60 رنز کے بڑے مارجن سے شکست دے دی۔
”پاکستان ٹائم“کے مطابق کراچی کے نیشنل بینک سٹیڈیم میں چیمپئنز ٹرافی کا افتتاحی میچ پاکستان اور نیوزی لینڈ کے درمیان کھیلا گیا،میچ کا ٹاس پاکستان نے جیت کر پہلے کیویز کو بیٹنگ کی دعوت دی۔ایونٹ کے پہلے میچ میں پاکستان کی ٹیم 321 رنز کے تعاقب میں 260 رنز بنا کر آوٹ ہو گئی۔پاکستان کی جانب سے خوشدل شاہ 69 اور بابر اعظم 64 رنز بنا کر نمایاں رہے۔سلمان آغا 42،فخر زمان 24،حارث روف 19،شاہین شاہ آفریدی 14،نسیم شاہ 13،سعود شکیل 6،کپتان محمد رضوان 3 اور طیب طاہر 1 رن بنا کر آوٹ ہوئے۔اس سے قبل پہلے بیٹنگ کرتے ہوئے میچ میں نیوزی لینڈ کا آغاز اچھا نہیں رہا،پاکستان کو پہلی کامیابی سپنر ابرار احمد نے دلائی اور 39 کے مجموعی سکور پر 10 رنز بنانے والے ڈیون کونوے کو کلین بولڈ کر دیا۔اگلے ہی اوور میں نسیم شاہ نے کین ولیمسن کو صرف ایک رن پر وکٹوں کے پیچھے کپتان رضوان کے ہاتھوں کیچ آوٹ کروا کے پویلین بھیج دیا۔اس کے بعد 73 کے سکور پر نیوزی لینڈ کو تیسرا نقصان اٹھانا پڑا،ڈیرل مچل 10 رنز بناکر حارث روف کی گیند پر شاہین شاہ آفریدی کے ہاتھوں کیچ آوٹ ہوکر پویلین لوٹ گئے۔ابتدائی 3 وکٹیں جلد گرنے کے بعد کیوی بیٹنگ لائن سنبھل گئی،ول یونگ اور ٹام لیتھم نے 118 رنز کی اہم شراکت قائم کرکے ٹیم کی پوزیشن مستحکم کی،ول یونگ ایک چھکے اور 12 چوکوں کی مدد سے 107 رنز کی اننگز کھیل کر آوٹ ہوئے۔بعد ازاں،ٹام لیتھم نے بھی اپنی شاندار سینچری مکمل کی،ان کی اننگز میں 3 چھکے اور 10 چوکے شامل تھے،وہ 103 گیندوں پر 115 رنز بناکر ناٹ آوٹ رہے۔گلین فلپس نے بھی جارحانہ بلے بازی کرتے ہوئے اپنی نصف سنچری مکمل کی،انہوں نے 38 گیندوں پر 61 رنز بنائے جس میں 4 چھکے اور 3 چوکے شامل تھے۔قومی ٹیم کی جانب سے حارث روف اور نسیم شاہ نے 2،2 جبکہ محمد ابرار نے ایک وکٹ حاصل کی۔اس طرح نیوزی لینڈ نے پہلے بیٹنگ کرتے ہوئے مقررہ 50 اوورز میں 5 وکٹوں کے نقصان پر 320 رنز بنائے اور پاکستان کو جیت کے لیے 321 رنز کا ہدف دے دیا۔
نیوزی لینڈ کے 321 رنز کے تعاقب میں پاکستان کو پہلا دھچکا فخرزمان کی صورت میں لگا جو فیلڈنگ کے دوران انجری کی وجہ سے میدان سے باہر چلےگئے تھے اور قانون کے مطابق ابتدائی 20 منٹ تک بیٹنگ نہیں کرسکتے تھے۔ہدف کے تعاقب میں قومی ٹیم ابتدا سے ہی مشکلات کا شکار رہی اور انتہائی سست روی سے اسکور بورڈ کو آگے بڑھاتے رہے، فخرزمان کی غیر موجودگی میں سعود شکیل نے بابراعظم کے ساتھ اننگز کا آغاز کیا۔سعود شکیل 19 گیندوں پر 6 رنز بنانے کے بعد آوٹ ہوئے جس کے بعد کپتان محمد رضوان بیٹنگ کے لیے آئے اور وہ بھی 14 گیندوں پر صرف 3 رنز کے مہمان ثابت ہوئے۔پاکستان کی تیسری وکٹ 69 رنز پر گری،فخر زمان بیٹنگ کے لیے میدان میں اترے اور وہ 41 گیندوں پر صرف 24 رنز ہی بناسکے،جس کے بعد سلمان علی آغا نے کچھ مزاحمت دکھائی لیکن وہ 28 گیندوں پر 42 رنز کی اننگز کھیلنے کے بعد آوٹ ہو گئے۔ان کے بعد آنے والے طیب طاہر بھی جلد ہی وکٹ گنوا بیٹھے اور ایک رن پر آوٹ ہو گئے،اس کے بعد میچ کے آغاز سے ہی سست بیٹنگ کرنے والے بابر اعظم آوٹ ہونے تک مشکل میں دکھائی دیے،انہوں نے نصف سنچری تو سکور کی لیکن اپنی ٹیم کو مشکلات سے نہیں نکال سکے۔بابراعظم بھی 153 کے مجموعی اسکور پر آوٹ ہو گئے،وہ گیندوں پر 71 کے سٹرائیک ریٹ سے 64 رنز بناکر آوٹ ہوئے۔پاکستان کی ساتویں وکٹ 200 رنز پر گری،شاہین شاہ آفریدی 14 رنز بنا کر آوٹ ہوئے،ان کے بعد آوٹ ہونے والے کھلاڑی خوشدل شاہ تھے جنہوں نے میچ کو بچانے کی بھرپور کوشش کی لیکن تب تک بہت دیر ہو چکی تھی،خوشدل نے 49 گیندوں پر ایک چھکے اور 10 چوکوں کی مدد سے 69 رنز بنائے۔
