اسلام آباد(بیورو رپورٹ)وزیر اعظم شہباز شریف نے کہا ہے کہ پاکستان کا دفاع ناقابل تسخیر ہے،آرمی چیف جنرل عاصم منیر سچے پاکستانی،زبردست پروفیشنل ہیں،ان کے ہوتے ہوئے کوئی پاکستان کی طرف میلی آنکھ سے نہیں دیکھ سکتا،آرمی چیف کی زبان پر وہی ہوتا ہے جو دل میں ہوتا ہے،دہشت گردوں کی فنڈنگ کون کر رہا ہے؟بیرون ملک مقیم پاکستانی ہمارے سروں کے تاج ہیں،ان کی جتنی قدر کریں وہ کم ہے۔
”پاکستان ٹائم“کے مطابق اسلام آباد میں سمندرپار پاکستانیوں کے کنونشن سے خطاب کرتے ہوئے وزیر اعظم شہباز شریف نے کہا کہ اوورسیز پاکستانیوں کے جذبے کو سلام پیش کرتا ہوں،دنیا کے ہر کونے سے اوورسیز پاکستانی یہاں موجود ہیں،ایک کروڑسے زائد پاکستانی دنیا بھر میں آباد ہیں،اوورسیز پاکستانیوں نے دن رات محنت کر کے پیسے کمائے، اوورسیز پاکستانی ہمارے سروں کے تاج ہیں،ہم آپ کی جتنی قدر کریں وہ کم ہے،اوورسیز پاکستانی اربوں ڈالر وطن بھیج رہے ہیں،آپ دنیا بھر میں پاکستان کا جھنڈا بلند کر رہے ہیں،ہم آپ کوجتنی مراعات دیں وہ کم ہیں۔
وزیر اعظم شہباز شریف نے کہا کہ آرمی چیف کی زبان پر وہی ہوتا ہے جو دل میں ہوتا ہے،آرمی چیف سچے پاکستانی اور زبردست پروفیشنل ہیں،وطن کی خاطر خون دینے والوں کے خلاف ہرزہ سرائی سے بڑا جرم نہیں ہو سکتا،آرمی چیف کے ہوتے ہوئے کوئی پاکستان کو میلی آنکھ سے نہیں دیکھ سکتا،ملک میں دہشت گردی کے تانے بانے کہاں ملتے ہیں؟سب جانتے ہیں کون دہشت گردوں کی حمایت کر رہا ہے؟سب کوعلم ہے،ہمارے 80 ہزار لوگوں نے اپنی جانیں نثار کی ہیں، 2018 میں دہشت گردی کا مکمل خاتمہ ہو چکا تھا،ملک میں ایک بار پھر دہشت گردی پھیل رہی ہے،سب کو دہشت گردوں کے سہولت کاروں کا علم ہے،کون ان کو فنڈنگ کر رہا ہے کون سہولت دے رہا ہے؟اللہ قرآن میں کہتا ہے شہیدوں کو مردہ نہ کہو،ان کے خلاف برطانیہ میں زہر اگلا جاتا ہے،آپ ان لوگوں کا مقابلہ کریں تاکہ پتہ چلے عظیم پاکستانی ہیں،اوورسیز پاکستانی برطانیہ میں اداروں کو گالیاں دینے والوں کا مقابلہ کریں،کسی کی گالی کا جواب دینا مناسب نہیں،مناسب الفاظ میں جواب دیں،ہماری بہادر مسلح افراد کے خلاف منفی پروپیگنڈا ہو رہا ہے، محب وطن اس منفی مہم کےخلاف قومی کردار ادا کریں۔شہباز شریف نے کہا کہ غزہ اور کشمیر کیلئے ناچیز نے کروڑوں عوام کے جذبات کی عکاسی کی،کشمیریوں کی سیاسی اور سفارتی مدد کریں گے،غزہ میں ہمارے 50 ہزار بھائی بہن شہید کردیے گئے،آج بھی غزہ میں جنگ بندی معاہدے کی دھجیاں بکھیری جا رہی ہیں۔انہوں نے کہا کہ اوورسیز پاکستان ویڈیو لنکس کی سہولت جلد دی جائے گی،ویڈیولنکس کے ذریعےمتعلقہ وزراء سے بات ہو سکتی ہے،چیئرمین نادرا کو فی الفورسہولت دینے کی ہدایت کی ہے،وفاقی یونیورسٹیز میں اوورسیز پاکستانیوں کا کوٹہ رکھا جا رہا ہے،میڈیکل یونیورسٹیز میں بھی 15 فیصد کوٹہ رکھا گیا ہے،ایف بی آر اوورسیز پاکستانیوں کو فائلر کے طور پر ٹریٹ کرے گا، میڈیکل یونیورسٹیز میں بھی 15 فیصد کوٹہ رکھا گیا ہے،میرپور میں عالمی سطح کے ایئرپورٹ کی فیزبیلٹی کا حکم جاری کیا،نمایاں کارکردگی پراوورسیز پاکستانیوں کو سول ایوارڈز دیے جائیں گے،ہر سال 15 اوورسیز کو سول ایوارڈز دیے جائیں گے،نواز شریف نے ایئرپورٹ پر گرین چینل کا اعلان کیا تھا،میں آج پھر گرین چینل کااعلان کرتا ہوں،گرین چینل چند ہفتوں میں فعال ہو جائے گا۔اس موقع پر اوورسیزسیشن کے دوران خصوصی دستاویزی فلم بھی پیش کی گئی۔
