اسلام آباد(سٹاف رپورٹر )حکومتی اتحاد پاکستان ڈیموکریٹک موومنٹ کے صدر اور جمیعت علما اسلام کے سربراہ مولانا فضل الرحمان نے کہا ہے کہ تقسیم اختیارات کے آئینی فارمولہ پہ عمل درآمد یقینی بنا کر قومی اداروں کی ساکھ کی بحالی یقینی بنائیں گے۔
ملک میں وزیراعظم ہاوس اور عمران خان کی آڈیوز سامنے آنے کے بعد مولانا فضل الرحمان نے ردعمل دیتے ہوئے کہا کہ جلد ہی پی ڈی ایم کا اجلاس بلا کر پالیسی امور کو اپ ڈیٹ کریں گے،ہم قوم کو داخلی تقسیم کے آشوب سے نکال کر ملی وحدت کی طرف لے جانے کی کوشش کر رہے ہیں تاکہ سیاسی و معاشی بحرانوں پر قابو پایا جا سکے،کسی بھی ملک میں سیاسی استحکام ہی معاشی ارتقا کا زینہ اور قومی سلامتی کی مضبوط اساس بنتا ہے،سیاسی استحکام کے حصول کی بنیادی دستاویز وہ آئین ہے جو یہاں کے 22 کروڑ عوام کی اجتماعی سوچ کا مظہر ہے اور قومی میثاق کا درجہ رکھتا ہے۔
مولانا فضل الرحمان نے کہا کہ پی ٹی آئی کی حکومت نے ملک کو صرف اقتصادی طور پر ہی کمزور نہیں کیا بلکہ نفرت اور انتقام کی سیاست کے ذریعے قومی وحدت کو بھی پارہ پارہ کر دیا،پی ٹی آئی نے ہماری سماجی اقدار اور سیاسی روایات کو پامال کرکے ہاہمی احترام،سیاسی رواداری اور نوجوان نسل کی اخلاقیات کو آلودہ کر دیا،عمران نیازی نے دانستہ پارلیمنٹ کو کمزور،عدلیہ اور الیکشن کمیشن سمیت تمام اداروں کو متنازع بنایا،پی ڈی ایم تقسیم اختیارات کے آئینی فارمولہ پہ عمل درآمد یقینی بنا کر قومی اداروں کی ساکھ کی بحالی یقینی بنائے گی،امید ہے کہ پی ڈی ایم حکومت سیلاب کی تباہ کاریوں اور معاشی بدحالی میں گھری قوم کو بہت جلد دوبارہ اپنے پاوں پر کھڑا کرنے میں کامیاب ہو جائے گی۔
