پشاور(نیوز رپورٹر)خیبر پختونخوا کے وزیر خزانہ تیمور سلیم جھگڑا نے کہا ہے کہ ملک بھیک مانگ کر نہیں چل سکتا ہے، معاشی مسائل کے حل کے لیے طویل مدتی پالیسیاں بنانا ہونگی۔
پریس کانفرنس کرتے ہوئے خیبر پختونخوا کے وزیر خزانہ تیمور سلیم جھگڑا کا کہنا تھا کہ جب سے وفاقی حکومت آئی ہے ہمارے صوبے میں بننے والی بجلی کا پرافٹ ہمیں نہیں ملا نہ ہی قبائلی اضلاع کا بجٹ دیا جارہا ہے۔انہوں نے بتایا اس بارے میں سپریم کورٹ سے رجوع کرنے کا سوچ رہے ہیں۔
صوبائی وزیر نے کہا کہ عالمی مارکیٹ میں پاکستان کےبانڈزکی قدر بھی کم ہو گئی ہے،پاکستان کوعالمی سطح پر اپنی ساکھ مستحکم کرنے کی ضرورت ہے کیونکہ معیشت سکڑنے سےٹیکس کلیکشن میں بھی کمی ہو گی۔انہوں نے مزید کہا کہ موڈیز نے پاکستان کی ریٹنگ کو ڈاون کیا ہے اور ایسا پہلی بار ہوا ہے جس کی تین وجوہات بھی بتائی گئیں ہیں اور اسکا اثر ہماری ٹیکس کولیکشن پر پڑے گا۔
ان کا کہنا تھا کہ ایک نئے سروے میں آیا ہے جس میں موجودہ حکومت سے غیر مطمئن لوگ 83 فیصد ہے جبکہ سروے کے مطابق عمران خان کے ووٹرز کی تعداد 51 فیصد ہے اور ہر تین میں سے دو افراد آج ہی الیکشن کروانے کا کہہ رہے ہیں،یہی وجہ ہے کہ موجودہ پی ڈی ایم انتخابات سے بھاگ رہی ہے ۔
