اسلام آباد(وقائع نگار خصوصی) پاکستان تحریک انصاف کے سربراہ اور سابق وزیر اعظم عمران خان نے کہا ہے کہ فوری طورپر صاف و شفاف انتخابات کا انعقاد سیاسی و معاشی بحران سے نجات کا واحد ذریعہ ہے۔
تفصیلات کے مطابق سابق وزیراعظم عمران خان نے یہ بات نیشنل پریس کلب اور راولپنڈی اسلام آباد یونین آف جرنلسٹس کے وفد سے ملاقات کے دوران کہی۔اس موقع پر عمران خان کے چیف آف سٹاف سینیٹر شبلی فراز،مخدوم شاہ محمود قریشی اور فواد چودھری سمیت دیگر بھی موجود تھے۔
عمران خان سے ہونے والی ملاقات میں میڈیا کارکنان کو درپیش مسائل اور فلاحی اقدامات کی ضرورت پر تفصیلی بات چیت کی گئی۔
چیئرمین پی ٹی آئی نے کہا کہ تحریک انصاف کی سیاسی جدوجہد آئین و قانون کی بالا دستی سے عبارت ہے،قانون کی حکمرانی کے بغیر خوشحال معاشرے کی تشکیل کا تصور ہی محال ہے،کرپٹ اشرافیہ نے محض اپنے مفادات کیلئے دستور و قانون کی پامالی کا کلچر پروان چڑھایا،میڈیا پراعلانیہ و غیر اعلانیہ بندشوں کی نظیر کسی آمر کے دور سے لانا بھی ناممکن ہے،دہشت گردی کے پرچوں کے اندراج سے لے کر چینلوں کی بندشوں تک ہر حربہ آزمایا جارہا ہے۔
سابق وزیراعظم عمران خان نے کہا کہ تحریک انصاف کی حقیقی آزادی کی تحریک ملک میں قانون کی حکمرانی کا پیش خیمہ ثابت ہوگی،اہل قلم و دانش پر لازم ہے کہ ظلم و لاقانونیت کے خلاف کسی مصلحت کا شکار ہوئے بغیر آواز بلند کریں،قانون کے دائرے میں رہ کر تحریک کو بھرپوراندازمیں منطقی انجام تک پہنچانے کی تیاری کررہے ہیں۔
