کراچی(کورٹ رپورٹر)پاکستان تحریک انصاف(پی ٹی آئی)کی رکن سندھ اسمبلی دعا بھٹو نے اپنے شوہر رکن سندھ اسمبلی اور اپوزیشن لیڈر حلیم عادل شیخ سے خلع کے لیے عدالت سے رجوع کرلیا۔
تفصیلات کے مطابق پی ٹی آئی کی رکن سندھ اسمبلی دعا بھٹو نے اپنے شوہر حلیم عادل شیخ سے خلع کے لئے ملیر کی فیملی کورٹ میں خلع کی درخواست دائر کرتے ہوئے فیصلہ جلد سنانے کی اپیل کی ہے،دعا بھٹو نے خلع کے لیے مختلف وجوہات کا ذکر کرتے ہوئے بتایا کہ ان کے درمیان کچھ خاندانی اور نجی مسائل ہوگئے ہیں،جس وجہ سے وہ اب مزید ایک ساتھ نہیں رہ سکتے۔دعا بھٹو کی جانب سے خلع کے لیے عدالت سے رجوع کیے جانے کے معاملے پر تاحال حلیم عادل شیخ نے فوری طور پر کوئی جواب نہیں دیا۔
یاد رہے کہ حلیم عادل شیخ پی ایس 99 کراچی ایسٹ جب کہ دعا بھٹو خواتین کی مخصوص نشست سے رکن سندھ اسمبلی ہیں،دونوں کا تعلق تحریک انصاف سے ہے۔دونوں نے 2018 کے عام انتخابات کے فوری بعد شادی کی تھی،جسے تین سال تک خفیہ رکھا گیا تھا تاہم ستمبر 2021 میں دعا بھٹو کے ہاں بیٹے کی پیدائش کے بعد شادی کا اعتراف کیا گیا تھا۔دعا بھٹو سے حلیم عادل کی دوسری شادی کی تھی اور وہ ان سے عمر میں بھی بیس سال تک بڑے ہیں۔حلیم عادل شیخ 7 بچوں کے والد اور 56 سال کے ہیں جب کہ دعا بھٹو تقریبا 36سال کی ہیں۔شادی کے چار سال بعد اب دعا بھٹو نے مختلف وجوہات کے باعث شوہر سے خلع کے لیے عدالت سے رجوع کرلیا۔دعا بھٹو کے ہاں ستمبر 2021 میں بیٹے کی پیدائش ہوئی تھی جو اب بھی اپنی والدہ کے ساتھ رہتا ہے۔خلع کے بعد ممکنہ طور پر دونوں ایک ہی سیاسی جماعت پی ٹی آئی میں بھی نہیں رہیں گے تاہم اس حوالے سے کچھ بھی کہنا قبل از وقت ہے۔
