اسلام آباد(وقائع نگار خصوصی)وزیر اعظم شہباز شریف نے کہا کہ کسانوں کو 18 سو ارب روپے کے قرضہ جات دیے جائیں گے،یہ رقم پچھلے سال کے مقابلے میں 400 ارب روپے کا اضافہ کیا گیا ہے،بے زمین ہاریوں کو بلاسود قرضے دیں گے۔
اسلام آباد میں کسان پیکیج کے حوالے سے نیوز کانفرنس کرتے ہوئے وزیراعظم نے کہا کہ سیلاب نے پورے پاکستان میں تباہی مچائی، 40 لاکھ ایکٹر پر کھڑی فصلیں تباہ ہوگئیں،سندھ میں کھجور کا نام و نشان مٹ گیا،کپاس اور چاولوں کی فصلوں کو نقصان ہوا،اسی طرح گنے کی فصل کا بھی نقصان ہوا، پاکستان کی معیشت کو اگر کوئی چیز آگے بڑھا سکتی ہے تو ہماری زرعی معیشت ہے،زراعت کو تیزی سے آگے بڑھا سکتے ہیں،ایسا شعبہ ہے جو 6 مہینے میں اپنی معیشت کو بالکل ٹرانسفارم کرسکتا ہے۔
وزیر اعظم شہباز شریف نے کہا کہ سیلاب متاثرین کو 88 ارب روپے کی نقد اور اشیا کی شکل میں امداد تقسیم کی ہے،وفاق نے بے نظیر انکم سپورٹ پروگرام کے ذریعے 70 ارب روپے اور 18 ارب روپے این ڈی ایم اے کے ذریعے تقسیم کی ہے، جس میں کمبل، خوارک وغیرہ شامل ہیں۔وزیر اعظم شہباز شریف نے بتایا کہ کسانوں کو 18 سو ارب روپے کے قرضہ جات دیے جائیں گے،یہ رقم پچھلے سال کے مقابلے میں 400 ارب روپے کا اضافہ کیا گیا ہے،آپ جانتے ہیں کہ وزیر خزانہ ڈنڈا ہاتھ میں لے لیتے ہیں،بینکوں کو عادت ہے کہ وہ محفوظ سرمایہ کاری کرتے ہیں،ٹی بلز لے لیے،حکومتی بانڈز لے لیے، اور جو اصل شعبے ہیں،چھوٹے کسان،چھوٹے کاروباری لوگ ان کو پوچھتے تک نہیں ہیں،یہ ہمارے مالیاتی نظام میں سب سے بڑی بیماری ہے،مجھے امید ہے کہ ہم اس طرف آگے بڑھیں گے،اس بات کو یقینی بنائیں گے کہ قرضے پوری طرح کسانوں کو مہیا کیے جائیں،سیلاب سے متاثرہ علاقوں میں جو چھوٹے کسانوں پر جو قرضے تھے،ان پر شرح سود کو معاف کیا جارہا ہے،اس کے لیے 10 ارب 60 کروڑ روپے مختص کیے گئے ہیں،اسی طریقے سے وفاق اور چھوٹے صوبے مل کر سیلاب سے متاثرہ علاقوں میں چھوٹے کسانوں تقریباً 8 ارب 20 کروڑ روپے ان کو مہیا کیے ہیں۔
وزیراعظم شہبازشریف نے مزید کہا کہ دیہی علاقوں میں جو نوجوانوں بچے ہیں،پہلی مرتبہ زرعی شعبے کو شامل کیا گیا ہے،ان نوجوان بے روزگار بچوں کے لیے جو زرعی شعبے میں کام کرنا چاہیں گے،ان کو 50 ارب روپے کے قرضے دیے جائیں گے اور اس کے لیے حکومت پاکستان 6 ارب 40 کروڑ روپے سے شرح سود میں سبسڈی دے گی،ان کو سستا قرضہ مہیا کریں گے،ڈی اے پی کھاد کا فی ایکڑ پیداوار بڑھانے میں نہایت اہم کردار ادا کرتی ہے،ڈی اے پی بنانے کے لیے حکومت سستی گیس مہیا کرتی ہے،اس کو آرام سے مہنگے داموں بیچا جاسکتا ہے،ہم نے فرٹیلائزر کمپینوں سے مذاکرت کیے،ان سے ڈی اے پی کھاد کی فی بوری کی قیمت 2 ہزار 500 روپے کم کروائی گئی ہے،اس کے بعد اس کی قیمت کم ہو کر 11 ہزار 250 روپے ہو گئی ہے،کسانوں کو اس کا فائدہ ہوگا،سیلاب سے متاثرہ علاقوں میں گندم کے سرٹیفائیڈ بیج کی 12 لاکھ بوریاں مہیا کریں گے،اس کے لیے پچاس فیصد پیسے وفاق دے گا اور پچاس فیصد صوبے دیں گے،اس کے لیے 13 ارب 20 کروڑ روپے مختص کیے گئے ہیں،سیلاب زدہ علاقوں میں بے زمین ہاریوں کے لیے بلاسود قرضے دینے کے لئے 5 ارب روپے مختص کیے ہیں۔
