اسلام آباد(وقائع نگار خصوصی)وفاقی وزیر دفاع خواجہ محمد آصف کا کہنا ہے کہ نئے آرمی چیف کی تعیناتی کا ابھی فیصلہ نہیں ہوا ہے، اب وقت آگیا ہے کہ قوم عمران خان کے گریبان پر ہاتھ ڈالے،عمران خان کو اب اپنے جھوٹے بیانیے کی سیاسی قیمت ادا کرنا پڑے گی،جب عدم اعتماد کامیاب ہوئی تو ایک نئے دور کا آغاز ہوا،ہماری حکومت کوعمران خان نے کہا کہ یہ امپورٹڈ اور جعلی حکومت ہے۔
خواجہ آصف نے قومی اسمبلی میں خطاب کرتے ہوئے کہا کہ عمران خان کی حکومت کو آئینی طریقہ کار سے باہر نکالا، عمران خان نے جلسے میں اپنی جیب سے جعلی سائفر نکال کر لہرایا،لانگ مارچ میں حقیقی آزادی کا رونا رو رہا ہے، عمران خان کی سیاسی زندگی جھوٹ بولنے اور یوٹرن لینے میں گزری،کبھی بھی ایک نکتے پر نہیں کھڑا رہا، 2014 میں عمران خان 126 دن کا دھرنا دیکر ڈی چوک میں بیٹھا رہا،عمران خان نے توشہ خانہ میں اصلی چیزوں کی جگہ نقلی چیزیں رکھوائیں،توشہ خانہ میں اصلی گھڑیوں کی بجائے نقلی گھڑیاں رکھوائی گئیں،سابقہ دورحکومت میں کرپشن کی لمبی داستانیں موجود ہیں،عمران خان اقتدار اور دولت کی ہوس میں سرفہرست ہے، 126 دن ناچ گانے سے لوگوں کی قسمت کے ساتھ کھیلا گیا،عمران خان چاہتے ہیں کہ ملک کے اندر اور باہر اس کے سر پر کوئی ہاتھ رکھے،اتحادی حکومت نے کسی کو سیاسی انتقام کا نشانہ نہیں بنایا جب کہ عمران خا ن کے دور میں سیاسی انتقام کی آڑ میں رشتوں کا تقدس پامال کیا گیا۔
خواجہ آصف نے کہا کہ نامساعد حالات کے باوجود ملکی معیشت درست کرنے کی کوشش کر رہے ہیں، دو ہفتے سے لوگ جی ٹی روڈ پر رل رہے ہیں اور یہ گھر جا کر بیٹھ گیا ہے، یہ خود کسی سیلاب زدہ علاقے میں نہیں گیا، ساڑھے تین کروڑ سیلاب متاثرین آج سوال کررہے ہیں، اپنی حکومت میں اپنی مرضی کی ایف آئی آر درج نہیں کروا سکا، آج تک ملزم کو کسی عدالت میں پیش نہیں کیا جا سکا، جس شخص نے ملزم کو پکڑا وہ فیملی سمیت پنجاب حکومت کا مہمان ہے، عمران خان کی ساری کی ساری سیاست کی بنیاد جھوٹ پر ہے، آج عمران خان نے مجبور ہو کر زخموں کی ویڈیو بنا کر سوشل میڈیا پر ڈالی لیکن ابھی تک یہ فیصلہ نہیں ہوسکا کہ عمران خان کو کتنی گولیاں لگیں؟ ابھی بھی عمران خان لوگوں سے فنڈز لے رہے ہیں، پارلیمنٹ کے حوالے سے بھی عمران خان نے نازیبا الفاظ استعمال کیے، سابق ڈپٹی سپیکر نے عمران خان کے کہنے پر آئین شکنی کی۔
اس سے قبل میڈیا سے گفتگو کرتے ہوئے وزیر دفاع نے کہا ہے کہ آرمی چیف کی تعیناتی کا فیصلہ نہیں ہوا، نواز شریف سے ابھی تک آرمی چیف کی تعیناتی پر مشاورت نہیں ہوئی، یہ ہوائی خبریں ہیں۔ جب ایک صحافی نے استفسار کیا کہ نواز شریف کا آرمی چیف کی تعیناتی کا کوئی کردار ہے؟ تو انہوں نے واضح طور پر کہا کہ آرمی چیف کی تعیناتی پر مشورہ وزیر اعظم کی صوابدید ہے، وزیر اعظم ہی آرمی چیف کی تعیناتی کا فیصلہ کریں گے۔وزیردفاع خواجہ آصف سے جب پوچھا گیا کہ نواز شریف سے کیا کوئی مشاورت بھی نہیں ہو رہی ہے؟ تو انہوں نے کہا کہ ابھی تک آرمی چیف کی تعیناتی پر مشاورت نہیں ہوئی، یہ ہوائی خبریں ہیں۔
غیر رسمی بات چیت کے دوران جب خواجہ آصف سے استفسار کیا گیا کہ عمران خان نے امریکی سازش پر بیان تبدیل کیا، کیا اب بھی اسے سازش کہا جائے گا؟ تو انہوں نے کہا کہ کیا عمران خان پہلی بار مکر رہا ہے، وہ ہر چیز سے مکر جاتا ہے، گزشتہ چار سال میں کتنی باتیں کیں، کسی بات پر عمران خان کھڑا رہا ؟ عمران خان کس حالت میں ہوتا ہے اور کیا کہہ جاتا ہے اسے خود یاد نہیں رہتا۔ عمران خان نے کہا ہے کہ میرے قتل کی ایف آئی آر درج نہیں ہوئی، عمران خان کو یہ پتہ ہی نہیں کہ وہ کہتا کیا ہے؟
