لاہور(سٹاف رپورٹر)الیکشن کمیشن نے پنجاب میں بلدیاتی انتخابات اپریل کے آخری ہفتہ منعقد کرانے کا فیصلہ کرلیا ہے۔
چیف الیکشن کمشنر سکندر سلطان راجہ نے پنجاب میں بلدیاتی انتخابات سے متعلق اجلاس کی صدارت کی،اجلاس میں دی جانے والی بریفنگ میں بتایا گیا کہ پنجاب میں بلدیاتی اداروں کی معیاد یکم جنوری 2022کو ختم ہوچکی ہے۔بریفنگ کے مطابق الیکشن کمیشن تیسری دفعہ حلقہ بندیوں کے کام کا آغاز کرنے جارہا ہے،انتخابات کیلئے تاریخ پر صوبائی حکومت کے نمائندگان سے مشاورت کی جائے۔نمائندہ پنجاب حکومت کی جانب سے دی جانے والی ڈرافٹ رولز کابینہ کی آئندہ میٹنگ میں رکھے جائیں گے اور رولز کی منظوری کے بعد اِن کی کاپیاں الیکشن کمیشن کو مہیا کی جائیں گی۔چیف الیکشن کمشنر سکندر سلطان راجہ نے کہا کہ الیکشن کمیشن تمام صوبوں میں بلدیاتی انتخابات کرواچکا یا کروانے والا ہے،کہیں الیکشن شیڈول دے چکا ہے،صرف پنجاب باقی جہاں انتخابات کا انعقاد ممکن نہیں ہو سکا۔جس کے بعد الیکشن کمیشن پنجاب میں بلدیاتی انتخابات اپریل کے آخری ہفتہ منعقد کرانے کا فیصلہ کیا۔
