کراچی(کورٹ رپورٹر)سندھ ہائیکورٹ میں پاکستان تحریک انصاف کے اسیر رہنما سنیٹراعظم سواتی کے خلاف سندھ میں درج مقدمات کی سماعت کے دوران انسپکٹر جنرل(آئی جی )پولیس سندھ غلام نبی میمن نے عدالت سے معافی مانگ لی،عدالت نے تین دن میں اعظم سواتی کے خلاف مقدمات ختم کرنے سے متعلق حتمی رپورٹ پیش کرنے کا حکم دے دیا۔
تفصیلات کے مطابق پی ٹی آئی کے اہم رہنما سینیٹراعظم سواتی کے خلاف سندھ میں درج مقدمات کی سماعت جسٹس کے کے آغا نے کی، دوران سماعت انہوں نے ان مقدمات سے متعلق استفسارکیا جس پر پراسیکیوٹر جنرل نے بتایا کہ اعظم سواتی کے خلاف مختلف اضلاع میں مقدمات ہیں اور تمام مقدمات کو ’سی‘ کلاس کردیا گیا ہے۔پراسیکیوٹرجنرل سندھ نے درخواست گزار کے وکیل انور منصور خان سے استفسار کیا کہ آپ مطمئن ہیں؟جس پرانہوں نے کہاکہ ہم مطمئن ہیں مگر ایسے مقدمات درج کرتے ہوئے پولیس کوبھی سوچنا چاہیے۔آئی جی سندھ نے عدالت کو بتایا کہ اعظم سواتی کے خلاف تمام مقدمات ختم کردیے گئے ہیں،اس پرعدالت نے تین دن میں اعظم سواتی کے خلاف مقدمات ختم کرنے سے متعلق حتمی رپورٹ پیش کرنے کا حکم دیتے ہوئے سماعت ملتوی کردی۔آئی جی سندھ غلام نبی میمن نے گزشتہ سماعت کاحوالہ دیتے ہوئے عدالت سے معافی مانگ لی۔انہوں نے کہا کہ میں اپنے رویے پر معذرت چاہتا ہوں،میری باتوں سےغلط تاثر گیا۔اس موقع پر ڈی آئی جی ساتھ عرفان بلوچ،ایس ایس پی ساوتھ اور دیگر پولیس حکام عدالت میں موجود تھے۔سینیٹر اعظم سواتی کے خلاف درج مقدمات کے خلاف سماعت کے بعد آئی جی سندھ غلام نبی میمن نے صحافیوں کے سوالوں کا جواب دینے سے گریز کیا۔صحافی نے سوال کیا کہ اعظم سواتی کے خلاف کتنے مقدمات درج کیے گئے تھے؟تو آئی جی سندھ نے کہا معاملہ عدالت میں ہے، بات نہیں کرسکتا ۔صحافی نے سوال کیا کیسز تو سارے ختم ہوگئے ہیں تو آئی جی سندھ نے جواب دیا مقدمات ختم ہوگئے ہیں تومجھ سےکیوں پوچھ رہے ہیں۔
