اسلام آباد(سٹاف رپورٹر)چند دن قبل اسلام آباد میں ہونے والے خودکش بم دھماکے کی تحقیقات میں پیش رفت ہوئی ہے، انکشاف ہوا ہے کہ دھماکے کے روز ہی مشتبہ دہشت گرد خیبرپختونخوا سے اسلام آباد آیا۔
پاکستان ٹائم کے مطابق مشتبہ دہشت گرد صوبہ خیبرپختونخوا سے مسافر بس کے ذریعے اسلام آباد پہنچا تھا،تفتیش کاروں نے کرک، پیرودھائی اور آئی 4/10 میں ایک ہی شخص کی موجودگی کا انکشاف کیا۔مشتبہ دہشت گرد پہلے پیرودھائی بس ٹرمینل میں دیکھا گیا، اس کے بعد دہشتگرد کی جیو فینسنگ کے ذریعے آئی ٹن/4 کے علاقے میں موجودگی کا انکشاف ہوا۔ذرائع کے مطابق مشتبہ دہشت گرد بارودی مواد اور خودکش جیکٹ کے ساتھ سفر کر رہا تھا اور کسی دوسرے شخص کے ساتھ رابطے میں تھا۔ابتدائی تحقیقات میں اس بات کی تصدیق ہوگئی تھی کہ دھماکہ خودکش ہی تھا تاہم اس کی جزیات کے حوالے سے اختلافات ہیں۔ابتدائی معلومات سے اشارہ ملا تھا کہ دھماکا خیز مواد گاڑی میں تھا تاہم ابتدائی تحقیقات میں معلوم ہوا ہے کہ حملہ آورنے خودکش جیکٹ سے دھماکا کیا،خودکش جیکٹ میں تقریبا 15سے 18 کلوبارودی مواد موجو تھا۔
