ڈیرہ اسماعیل خان(کرائم رپورٹر)ڈی آئی خان کے علاقے کلاچی میں پولیس سٹیشن پر دہشت گردوں نے حملہ کردیا جس کے نتیجے میں 4 پولیس اہلکار زخمی ہوگئے۔
پولیس کے مطابق کلاچی میں ٹکواڑہ پولیس سٹیشن پردہشت گردوں کی جانب سے حملہ کیا گیا جس میں زخمی ہونے والے 3 پولیس اہلکاروں کو ہسپتال منتقل کردیا ہے۔حملہ کے دوران دہشت گردوں کی طرف سے راکٹ لانچر اور دستی بموں سمیت جدید ہتھیاروں کا بھی استعمال کیا گیا۔پولیس کا کہنا ہے کہ جوابی کارروائی کے دوران حملہ آور فرار ہونے میں کامیاب ہوگئے جبکہ پولیس نے علاقہ میں سرچ آپریشن شروع کر دیا۔ڈی آئی خان کے ضلعی پولیس افسر(ڈی پی او) محمد شعیب نے میڈیا سے گفتگو کرتے ہوئے کہا کہ 20 سے 30 شدت پسندوں نے چوکی پر حملہ کیا لیکن پولیس نے بہادری کا مظاہرہ کر کے حملے کو ناکام بنا دیا’شدت پسندوں نے 18 سے 20 تک راکٹ فائر کیے اور 30 سے زائد دستی بم پھینکے لیکن چونکہ یہ چوکی حساس تھی تو یہاں پر ہم نے پہلے سے پولیس کی تعداد بڑھا رکھی تھی،اس چوکی پر حالیہ دنوں میں آٹھ کے قریب حملے ہوئے ہیں اور ابھی حالیہ دنوں میں شدت پسندوں کی فائرنگ سے ایک پولیس اہلکار جان سے بھی گیا۔
انہوں نے کہا کہ میں اس چوکی سے تقریباً ایک گھنٹے کی مسافت پر رہتا ہوں،مجھے جب بتایا گیا کہ حملے میں چار پولیس جوان زخمی ہوئے ہیں تو پہلے میں حالات کو مانیٹر کر رہا تھا کیونکہ ایسے حالت میں ہم مزید نفری بھیجنے میں احتیاط سے کام لیتے ہیں،کیونکہ بعض شدت پسند مزید نفری بھیجنے کی صورت میں گھات لگائے بیٹھے ہوتے ہیں لیکن ہم نے تمام تر صورت حال کو دیکھتے ہوئے مزید نفری بھیج دی اور میں خود آپریشن میں حصہ لینے پہنچ گیا،جائے وقوعہ پر پہنچ کر پہلے ہم نے شدت پسندوں کا مقابلہ کیا اور وہ اپنے ہلاک اور زخمی ساتھیوں کو لے کر فرار ہوگئے جبکہ اس آپریشن میں پولیس کے چار جوان زخمی ہوئے ہیں لیکن ان کی حالت اب خطرے سے باہر ہے،حالیہ دنوں میں یہ کسی بھی پولیس چوکی پر سب سے بڑا حملہ تھا لیکن اللہ کا شکر ہے کہ حملے کو ناکام بنا دیا گیا،ہمیں اطلاع ہے کہ اس حملے کے مقام کے آس پاس کے اضلاع جیسے کہ لکی مروت سے بھی شدت پسند آئے ہوئے تھے اور کسی بڑے کارروائی کی منصوبہ بندی کر رکھی تھی،کلاچی میں شدت پسندوں کا مسئلہ پہلے سے موجود ہے اور اس سے پہلے بھی یہاں پر مختلف شدت پسندوں نے حملے کیے ہیں لیکن ہم کوشش کر رہے ہیں کہ علاقے سے شدت پسندوں کا صفایا کر سکیں۔
