مظفرآباد(ایجوکیشن رپورٹر)آزاد جمو ں و کشمیر یونیورسٹی میں پی ایچ ڈی اردو پروگرام شروع کرنے کی منظوری، شعبہ اردو کے بورڈ آف سٹڈیز نے تحقیقی مجلہ”تسوید“ کے اجرا سمیت متعدد کورسز کے نصاب و تدریسی طریقہ کار کو بھی منظور کر لیا،ماہرین تعلیم نے قومی زبان کی اہمیت و ضرورت کے پیش نظر ”اردو زبان و ادب“ کو یونیورسٹی کے تمام شعبہ جات میں لازمی کورس کے طور پر پڑھانے کی بھی سفارش کر دی۔
یہ بھی پڑھیں:بی ایڈ نہ کرنے والے اساتذہ کی شامت آگئی، رپورٹ طلب
جامعہ کشمیر شعبہ اردو کے پانچویں بورڈ آف سٹڈیز کا اجلاس چہلہ کیمپس میں ہوا،بورڈ آف سٹڈیز کے کنونیئر کوآرڈنیٹر شعبہ اردو ڈاکٹر میریوسف میر تھے جبکہ شعبہ کی طرف سے ڈاکٹر محمد جاوید خان اسسٹنٹ پروفیسر، ڈاکٹر عاصمہ کبیر لیکچرر بطور ممبر اور مہتاب احمد لیکچرر بطور سیکرٹری شریک ہوئے جبکہ اجلاس میں جامعہ آزاد جموں و کشمیر کے کنٹرولر امتحانات پروفیسر ڈاکٹر واجد عزیز لون،صدر شعبہ اردو ہزارہ یونیورسٹی مانسہرہ ڈاکٹر الطاف یوسف زئی،صدر شعبہ اردوفیڈرل اردو یونیورسٹی اسلام آباد ڈاکٹر فہمیدہ تبسم،پرنسپل پوسٹ گریجویٹ کالج مظفر آباد ڈاکٹر عبدالکریم،ایسوسی ایٹ پروفیسر پوسٹ گریجویٹ کالج راولا کو ٹ ڈاکٹر ظفر حسین،ناظم اعلیٰ تحقیق ترقی و نصاب حکومت آزاد کشمیر راجا محمد نصیر خان سمیت دیگر ممبران خصوصی طور پر شریک ہوئے، اجلاس میں پی ایچ ڈی اردو پروگرام کے نصاب و تدریسی طریقہ کاراور شعبہ اردو کے زیر اہتمام تحقیقی مجلہ ”تسوید “کی منظوری دی گئی،اجلاس میں شرکا نے کافی بحث و تمحیص کے بعد ایسوسی ایٹ ڈگری پروگرام برائے کالجز کے نصاب و تدریسی طریقہ کار اورانٹری اِن سمسٹر پروگرام کے نصاب و تدریسی طریقہ کارسمیت بی ایس،ایم فل،پی ایچ ڈی کے خاکہ و مقالہ کے طریقہ کار و پیٹرن کی بھی منظوری دی۔
اجلاس میں شریک ماہرین تعلیم نے قومی زبان اردو کی اہمیت و ضرورت کے پیش نظر”اردو زبان و ادب“ کو یونیورسٹی کے تمام شعبہ جات میں لازمی کورس کے طور پر پڑھانے کی بھی سفارش کر دی،اس موقع پر شرکا نے شعبہ اردو کی کارکردگی پر اطمینان کا اظہار کرتے ہوئے کہا کہ جامعہ آزاد جموں و کشمیر کا شعبہ اردو اگرچہ ابھی کم سن ہے مگر محدود وسائل کے باوجود وائس چانسلر ،یونیورسٹی حکام اور شعبہ کی فیکلٹی کی کوششوں سے اس وقت یہ شعبہ پاکستان کی بڑی جامعات کے شعبوں سے مقابلہ کر رہا ہے،جامعہ کشمیر شعبہ اردو سے فارغ التحصیل طلبہ جہاں تعلیمی میدان میں ریاست کی ضرورت پوری کر رہے ہیں وہیں قومی سطح پر بھی اپنی صلاحیتیوں کا لوہا منوا کر ریاست اور جامعہ کا نام روشن کر رہے ہیں۔شرکا نے اس موقع پر اپنے اپنے اداروں کی جانب سے شعبہ اردو کو مکمل تعاون کی یقین دہانی کروائی،کوآرڈنیٹر شعبہ اردو ڈاکٹر میر یوسف میر نے تمام مہمانوں کا شعبہ کی جانب سے آمد پر شکریہ ادا کیا،اجلاس کے آخر میں ملکی سلامتی کے لیے اجتماعی دعا بھی کی گئی۔
