لاہور (ایجوکیشن رپورٹر)یونیورسٹی آف انجینئرنگ اینڈ ٹیکنالوجی لاہور( یو ای ٹی)ٹیچنگ سٹاف ایسوسی ایشن(ٹی ایس اے)کے زیر اہتمام وفاقی بورڈ آف ریونیو (ایف بی آر)کی جانب سے اساتذہ اور ریسرچرز کی تنخواہوں میں 25 فیصد ٹیکس کٹوتی کے فیصلے کے خلاف شدید احتجاج کا سلسلہ جاری ہے۔
”پاکستان ٹائم“کے مطابق اساتذہ نے ہاتھوں میں پلے کارڈز اٹھا کر لائبریری چوک میں احتجاج کیا،پلے کارڈز پر مختلف نعرے درج تھے۔اس سلسلے میں صدر ٹی ایس اے ڈاکٹر محمد شعیب کی زیر صدارت اہم اجلاس منعقد ہوا جس میں ایسوسی ایشن نے جنرل باڈی میٹنگ بلانے کا فیصلہ کیا تا کہ آئندہ کا لائحہ عمل طے کیا جائے۔اجلاس میں ٹی ایس اے کے ارکان نے اس فیصلے سے اساتذہ اور محققین پر پڑنے والے منفی اثرات پر تشویش کا اظہار کیا۔ٹی ایس اے کے صدر نے کہا کہ اگر یہ نوٹیفیکیشن واپس نہ لیا گیا تو احتجاج کا سلسلہ جاری رکھیں گے۔ٹی ایس اے کے جنرل سیکرٹری ڈاکٹر تنویر قاسم نے کہا کہ یہ اقدام اساتذہ اور محققین پر سنگین مالی اثرات مرتب کرے گا اور ان کے معاشی مفادات کو نقصان پہنچائے گا،ایسوسی ایشن اپنے اساتذہ کے جائز حقوق کے تحفظ کے لیے پرعزم ہے اور اس وقت تک اپنی جدوجہد جاری رکھے گی جب تک اس غیر منصفانہ ٹیکس کٹوتی کو واپس نہیں لیا جاتا۔اجلاس میں ڈاکٹر فہیم گوہر اعوان، ڈاکٹر عثمان،ڈاکٹر اویس،ڈاکٹر شمائلہ،ڈاکٹر ھدی،ڈاکٹر رضوانہ،ڈاکٹر محمد عرفان جلیس نے شرکت کی۔
