کراچی(سٹاف رپورٹر)الیکشن کمیشن نے سیکریٹری داخلہ کو خط ارسال کیا ہے جس میں کہا گیا ہے کہ کراچی اور حیدر آباد بلدیاتی انتخابات کے لئے انتہائی حساس پولنگ سٹیشنز پر فوج اور رینجرز کی تعینات کی جائے ۔
الیکشن کمیشن کی جانب سے لکھے گئے خط میں کہا گیا ہے 15 جنوری کو سندھ میں دوسرے مرحلے کے بلدیاتی انتخابات ہیں،سندھ میں رینجرز کو دوسرے درجے اور فوج کو تیسرے درجے پر تعینات کیا جائے۔
خط میں لکھا گیا ہے علاقے کی حساسیت اور کسی ناخوشگوار واقع سے نمٹنے کے لئے انتہائی حساس پولنگ سٹیشن پر پاک فوج اور رینجرز کی تعیناتی کی جائے۔خط کے مطابق پولنگ سٹاف کو آر او آفس سے بیلٹ پیپرز کی پولنگ سٹیشن تک ترسیل کے لئے سیکیورٹی بھی یقینی بنائی جائے جبکہ ووٹ کی گنتی اور بیلٹ پیپرز کی آر او آفس سے واپسی کے لئے سیکیورٹی یقینی بنائی جائے۔
یاد رہے کہ الیکشن کمیشن نے کراچی کے بلدیاتی انتخابات میں ووٹر لسٹوں سے متعلق متحدہ قومی موومنٹ(ایم کیو ایم) پاکستان کی درخواست مسترد کرتے ہوئے محفوظ فیصلہ سنادیا جس میں حکومت سندھ کو انتخابات کا انعقاد یقینی بنانے کی ہدایت کردی گئی ہے۔الیکشن کمیشن پاکستان کی جانب سے جاری کیے گئے فیصلے کے مطابق سندھ میں بلدیاتی انتخابات کے دوسرے مرحلے میں کراچی،حیدر آباد اور ٹھٹہ میں پولنگ 15 جنوری کو ہی ہوگی۔
