لاہور(کرائم رپورٹر)وزیر آباد میں پاکستان تحریک انصاف( پی ٹی آئی)کے چیئرمین اور سابق وزیر اعظم عمران خان پر حملے کی تحقیقات کے لئے بنائی گئی جوائنٹ انویسٹی گیشن ٹیم(جے آئی ٹی) کے 4 ممبران اور سی سی پی او لاہور کے مابین اختلافات سامنے آگئے۔
ذرائع کے مطابق جے آئی ٹی کے سربراہ سی سی پی او لاہور غلام محمود ڈوگر نے سانحہ وزیر آباد کی تفتیش اینٹی کرپشن کے ایک افسر کو سونپ دی ہے،اینٹی کرپشن میں تعینات انور شاہ ملزم نوید سے اس کیس کی تفتیش کر رہے ہیں،ملزم سے جے آئی ٹی کے کسی ممبر کو تفتیش یا پوچھ گچھ تک نہیں کر دی گئی جس پر جے آئی ٹی کے چار ممبران نے موجودہ تفتیش سے اختلاف کر دیا ہے۔جے آئی ٹی کے چاروں ممبران نے محکمہ داخلہ اور آئی جی پنجاب کو اس بارے میں آگاہ کر دیا۔جے آئی ٹی نے تحریری طور پر محکمہ داخلہ کو مراسلہ بھیج دیا ہے،جے آئی ٹی ممبرز کا ملزم نوید سے کی جانے والی تفتیش سے اختلاف ہے۔اختلاف کرنے والے جے آئی ٹی ارکان میں خرم شاہ،نصیب اللہ،احسان اللہ اور ملک طارق محبوب شامل ہیں۔یاد رہے کہ ملزم نوید کو گزشتہ روز جوڈیشل کر دیا گیا تھا۔
واضح رہے کہ گزشتہ سال 3 نومبر کو پی ٹی آئی کے لانگ مارچ کے دوران وزیر آباد میں عمران خان پر قاتلانہ حملہ کیا گیا تھا،جس میں پی ٹی آئی چیئرمین زخمی ہوئے تھے۔واقعے میں ایک شخص جاں بحق اور پی ٹی آئی چیئرمین و دیگر رہنماوں سمیت 13 افراد زخمی ہوئے تھے۔فائرنگ کرنے والے شخص کو بعد میں کنٹینر کے قریب سے پکڑ لیا گیا تھا جس نے عمران خان پر فائرنگ کا اعتراف بھی کیا تھا۔
