لاہور(سپورٹس رپورٹر)قومی ٹیم کے کپتان اور سٹار بلے باز بابر اعظم کی تینوں فارمیٹ کی کپتانی برقرار رہے گی یا نہیں؟فیصلہ نیوزی لینڈ سیریز کے بعد ہوگا۔
’پاکستان ٹائم‘کے مطابق پاکستان کرکٹ بورڈ(پی سی بی)کے چیئرمین نجم سیٹھی دیگر ممبران سے مشاورت سے بابر اعظم کے مستقبل کا حتمی فیصلہ کریں گے،پی سی بی مینجمنٹ کمیٹی بابر اعظم کی کپتانی کا باریک بینی سے معائنہ کررہی ہے۔مینجمنٹ کمیٹی کے کچھ ارکان کو بابر اعظم کی ٹیسٹ کپتانی پر تحفظات ہیں،کچھ کی نظر میں ہوم سیریز کے دوران اہم موقع پر کپتان نے فیصلے درست نہیں کئے،چند ارکان سمجھتے ہیں کہ مین باولرز کی انجری کے باعث بابر اعظم کو بطور کپتان مشکلات پیش آئیں،چند ارکان کی رائے ہے کہ بابر اعظم ہمارے اہم کھلاڑی ہیں،ان کو بطور کپتان مزید موقع دینے کی ضرورت ہے۔
ذرائع پی سی بی کا کہنا ہے کہ مینجمنٹ کمیٹی کی اکثریت بابر اعظم کی ون ڈے اور ٹی ٹوئنٹی کی کپتانی سے مطمئن ہے۔دوسری طرف معروف سپورٹس رپورٹر عبدالقادر خواجہ نے مائیکرو بلاگنگ ویب سائٹ پر ٹویٹ کرتے ہوئے کہا کہ”فاختہ نے بتایا ہے کہ چئیرمین پی سی بی ایم سی نجم سیٹھی نے بابر اعظم کو فل اختیار دے دئیے ہیں اور انکو کہا ہے کہ کہ وہ اپنی مرضی کی پلئینگ الیون بنائے،جس کو شامل کرنا ہے کریں،انکے معاملے میں کوئی عمل دخل نہیں کرے گا۔
یاد رہے کہ بابر اعظم نے پچھلے سال بطور کپتان دس ٹیسٹ میچز میں سے صرف 1 میچ جیتا 5 ہارے اور 4 برابر رہے۔ جبکہ بابر اعظم کی کپتانی میں پاکستان نے آخری 10 ون ڈے میں سے 9 میں جیت حاصل کی ہے۔بابر اعظم کی کپتانی میں قومی ٹیم نے ایشیا کپ اور ٹی ٹوئنٹی ورلڈ کپ کا فائنل بھی کھیلا ہے،بطور کپتان بابر اعظم نے پچھلے ایک سال میں 26 ٹی ٹوئنٹی میچوں میں سے 14 میچز جیتے۔
