فتح جنگ(کورٹ رپورٹر)مسجد نبویﷺ ہنگامہ آرائی کیس میں سابق وزیر داخلہ اور پاکستان عوامی مسلم لیگ کے سربراہ شیخ رشید احمد اور ان کے بھتیجے رکن قومی اسمبلی شیخ راشد شفیق کو بری کردیا،جوڈیشل مجسٹریٹ فتح جنگ محمد عارف نے ضابطہ فوجداری کے تحت دائر بریت کی درخواست پر فیصلہ سنایا۔
’پاکستان ٹائم ‘کے مطابق وزیر اعظم شہباز شریف کے دورہ سعودی عرب کے دوران بعض افراد نے سیاسی نعرے لگاتے ہوئے ہلڑبازی کی تھی جس پر ن لیگی رہنما قاضی طارق نے تھانہ نیو ائیر پورٹ فتح جنگ میں مقدمہ درج کروایا تھا۔عمران خان،شیخ رشید احمد،فواد چوہدری،قاسم سوری،مراد سعید اور راشد شفیق و دیگر کے نام توہین مذہب کیس میں شامل تھے تاہم پولیس نے عمران خان سمیت دیگر افراد کے نام مقدمہ سے خارج کر دیئے گئے تھے۔شیخ رشید نے مقدمہ کے خلاف ہائیکورٹ سے رجوع کیا جس پر پولیس نے انھیں مقدمہ میں بے گناہ قرار دیدیا تاہم چالان میں انہیں ملزم ٹھہرائے جانے کے باعث بریت کی درخواست کا سہارا لینا پڑا تھا۔عدالت نے دو روز قبل دلائل مکمل ہونے پر فیصلہ محفوظ کیا تھا،جو کہ آج سناتے ہوئے شیخ رشید احمد اور شیخ راشد شفیق کو بری کردیا۔
واضح رہے کہ گذشتہ سال اکتوبر میں پاکستانی وزیر اعظم شہباز شریف اور معاون خصوصی علامہ طاہر محمود اشرفی کی اپیل پر سعودی عرب کے ولی عہد شہزادہ محمد بن سلمان نے مسجد نبویﷺمیں ہنگامہ آرائی کرنے کے الزام میں قید میں تمام پاکستانیوں کو رہا کرنے کا حکم دیا تھا۔مسجد نبویﷺ میں ہنگامہ آرائی کرنے کے نتیجے میں تین پاکستانی شہریوں کو آٹھ سال اور دیگر تین کو چھ سال قید کی سزا سنائی گئی تھی۔
