اسلام آباد(کورٹ رپورٹر)الیکشن کمیشن آف پاکستان نے کراچی اور حیدرآباد میں بلدیاتی انتخابات پر جوڈیشل آرڈر جاری کرتے ہوئے سندھ حکومت کی جانب سے الیکشن ملتوی کرنے کی درخواست مسترد کردی،بلدیاتی انتخابات 15جنوری کو ہی ہوں گے،الیکشن کمیشن کی جانب سے جاری ہونے والے حکم پر چیف الیکشن کمشنر سکندر سلطان راجہ اورچاروں ارکان کے دستخط موجود ہیں۔
’پاکستان ٹائم‘ کے مطابق الیکشن کمیشن نے کراچی اور حیدرآباد میں دوسرے مرحلے پر ہونے والے بلدیاتی انتخابات کے سلسلے میں سندھ حکومت کا 12 جنوری کو جاری نوٹیفکیشن غیر قانونی قراردے دیا۔جوڈیشل آرڈر کے مطابق کراچی اور حیدر آباد میں بلدیاتی انتخابات 15 جنوری کو ہوں گے۔الیکشن کمیشن کی جانب سے جاری جوڈیشل آرڈر میں کہا گیا کہ آئی سندھ اور چیف سیکریٹری شفاف انتخابات کے لئے ضروری اقدامات کریں،سپیشل سیکریٹری الیکشن کمیشن کو بھی فوری کراچی پہنچنے کی ہدایت کی جاتی ہے۔
جوڈیشل آرڈر میں کہا گیا کہ سندھ حکومت کا بلدیاتی انتخابات کا نوٹیفکیشن واپس لینا آئین کی خلاف ورزی ہے، سندھ میں بلدیاتی انتخابات کے انعقاد کے لئے سروے کیا گیا،خیرپور،دادو اورخیرپور ناتھن شاہ میں بلدیاتی انتخابات کے لئے ماحول سازگار ہے۔سندھ میں مختلف وجوہات کی بنا پر 3 مرتبہ بلدیاتی انتخابات ملتوی ہو چکے،ایم کیو ایم کے اعتراضات پر الیکشن کمیشن فیصلہ دے چکا،الیکشن کمیشن سندھ میں بلدیاتی انتخابات کے حوالے سے تمام تیاریاں مکمل کرچکا ہے۔بیلٹ پیپرز کی چھپائی اور انتخابی سامان کی ترسیل کا عمل بھی مکمل کیا جاچکا،الیکشن شیڈول جاری ہونے کے بعد حلقہ بندی تبدیل نہیں کی جاسکتی،سندھ حکومت اور قانون نافذ کرنے والے ادارے پر امن بلدیاتی انتخابات یقینی بنانے کے لئے ہر ممکن اقدامات کریں،سندھ میں بلدیاتی انتخابات کا دوسرا مرحلہ ہر صورت 15 جنوری کو مکمل کیا جائے گا۔
