کراچی(سٹاف رپورٹر)متحدہ قومی موومنٹ پاکستان (ایم کیو ایم) کا کہنا ہے کہ کراچی میں نئی حلقہ بندیاں ہونے تک الیکشن نہیں ہو سکتے۔
کراچی میں ایم کیو ایم رہنماوں کے ہمراہ پریس کانفرنس کرتے ہوئے بیرسٹر فروغ نسیم نے کہا کہ سندھ حکومت کی بنائی گئی یوسیز درست نہیں،بلدیاتی ایکٹ کے تحت سندھ حکومت نے حلقہ بندیاں کیں،حلقہ بندیوں کے خلاف ہم نے عدالت سے رجوع کیا،پاکستان تحریک انصاف(پی ٹی آئی) نے ہماری درخواست کی حمایت کی اور اسے کاپی پیسٹ کیا، جون میں ہماری درخواست کی شنوائی ہوئی،مہاجر آبادی کے ووٹ کو تقسیم کرنے کی سازش کی گئی،ایک یوسی میں 90 ہزار،دوسری میں 30 ہزار ووٹ ہیں،قانون کے مطابق یوسیز میں 10 فیصد سے زائد اور کم کا فرق نہیں ہونا چاہئے جس کے تحت ہم نے بر وقت سپریم کورٹ سمیت عدالتوں میں درخواستیں دائر کی تھیں،سپریم کورٹ نے الیکشن کمیشن اور سندھ حکومت سے رجوع کا کہا تھا۔
اس موقع پر فیصل سبزواری کا کہنا تھا کہ آئین الیکشن کمیشن کوشفاف الیکشن کرانے کا اختیار دیتا ہے،ناظم آباد کی آبادی زیادہ ہونے کے باوجود نشستیں کم ہیں جب کہ دیگر علاقوں میں آبادی کم ہونے کے باوجود نشستیں زیادہ ہیں،بینر لگانے یا پیسا خرچ کرنے سے میئر نہیں بنتا،صرف ایم کیو ایم نے عدالت میں مردم شماری کو چیلنج کیا،حکومت کو بین الوزارتی کمیٹی بنانی پڑ گئی،لہٰذا ہمارا مطالبہ ہے کہ کراچی کی آبادی کو درست گنیں،آبادی درست گنی جائے گی تو وسائل کی درست تقسیم ہوگی۔
