کراچی(سٹاف رپورٹر)ملکی سیاسی گرما گرمی میں جہاں پاکستان تحریک انصاف( پی ٹی آئی) کی جانب سے وزیراعظم شہباز شریف کیلئے اعتماد کا ووٹ لینے کے مطالبے کا عندیہ دیا جارہا ہے وہیں پاکستان ڈیمو کریٹک موومنٹ( پی ڈی ایم )کی اہم اتحادی جماعت متحدہ قومی موومنٹ (ایم کیو ایم)پاکستان کے رہنما ڈاکٹرفاروق ستارنے سوال اٹھادیا کہ ’ہم شہباز شریف کو ووٹ کیوں دیں؟؟؟۔
نجی ٹی وی کے پروگرام میں ڈاکٹر فاروق ستارنے کراچی اورحیدرآباد میں بلدیاتی انتخابات کے بائیکاٹ کے بعد حکومت میں رہنے یا نہ رہنے کی قیاس آرائیوں سے متعلق بات کرتے ہوئے اس اتحاد کو ’ون وے ٹریفک‘ قراردیا اور کہا کہ میری شمولیت تو ایم کیو ایم میں ابھی ہوئی ہے اور ظاہر ہے گزشتہ چند سال میں بہت سارے فیصلوں پراس طرح کی تنقید ہوئی ہے لیکن یہ جو پی ڈی ایم کے ساتھ حکومت میں رہنے یا چھوڑنے کی جو بات ہو رہی ہے، ملکی مفاد اور جمہوری عمل کے تسلسل کے لئے ایم کیو ایم نے حکومت میں شمولیت تو اختیار کی ہوئی ہے لیکن یہ ون وے ٹریفک ہے۔
انہوں نے کہا کہ لوگوں کی تنقید جائز ہے، ہم نے قربانیاں ہرطرح کی دے دیں، ملکی معیشت کے استحکام کے لیے، ڈالر قابو کرنے کے لیے، تجارتی خسارہ کم کرنے کے لیے، یہ ون وے ہے، پاکستان بنانا ہو ، پاکستان بچانا ہو تو ہمارے آباو¿اجداد کی موجودہ نسل کی قربانیاں ، کراچی والوں کی قربانیاں ہیں لیکن اب کراچی والے پوچھتے ہیں کہ ہم پورے ملک کیلئے سوچتے ہیں ،اب ہمارے لیے بھی کوئی سوچے گا۔ڈاکٹرفاروق ستار نے واضح کیا کہ پی ٹی آئی کی جانب سے اعتماد کا ووٹ لینے کے مطالبے پر شہباز شریف ہمارے پاس ووٹ لینے آئیں گے تو ہم تو ان سے یہ سوال کریں گے کہ بھئی ہم آپ کو ووٹ کیوں دیں، وجہ بتائیں؟؟ ہم یہ نہیں کہہ رہے کہ ووٹ نہیں دیں گے، ہم پوچھ رہے ہیں کہ وزیراعظم وجہ بتادیں کہ اگر ایسا ہو تو ہم انہیں اعتماد کا ووٹ کیوں دیں؟۔انہوں نے سوال اٹھایا کہ گزشتہ 10 ماہ میں کراچی کیلئے 65 کروڑ گیلن پانی کے منصوبے کے 4 میں کیا پیشرفت کی گئی، سرکلر ریلوے ، کچرا اٹھانے کے نظام میں بہتری کا کیا ہوا؟ صوبے میں پی پی کی حکومت تھی تو وفاق میں ن لیگ کی، پہلے اختلاف تھا تو ایک دوسرے پر ڈالتے تھے کہ رقم نہیں مل رہی لیکن اب دونوں پی ڈی ایم سے جڑے ہیں تو بتائیں کہ شہر کے لیے کیا کیا۔
