35اراکین اسمبلی کے استعفوں کی منظوری ،تحریک انصاف کا سخت ردعمل آ گیا
اسلام آباد(سٹاف رپورٹر)سپیکر قومی اسمبلی راجا پرویز اشرف کی جانب سے پاکستان تحریک انصاف(پی ٹی آئی )کے 35 اراکین کے استعفے منظور کیئے جانے اور الیکشن کمیشن کی جانب سے ان اراکین کو ڈی نوٹیفائی کرنے پر پی ٹی آئی رہنماوں کا سخت ردعمل سامنے آگیا ہے۔
’پاکستان ٹائم ‘ کے مطابق سابق وزیر خارجہ پاکستان تحریک انصاف کے وائس چیئرمین شاہ محمود قریشی نے کہا ہے کہ عدالت نے استعفوں کے مطابق طریقہ کار طے کیا تھا جس پر سپیکر نے رضامندی ظاہر کی تھی، سپیکر نے ہمارے استعفوں پر اعتراض عائد کیا تھا کہ استعفے ہاتھ سے لکھے ہوئے نہیں، ہم نے خط لکھ کر ملاقات کے لئے کہا تو راجہ پرویز اشرف کا کہنا تھا ایک ایک کو بلاکر تصدیق اور مظوری کے معاملے پر مشاورت کریں گے، الیکشن کمیشن کا غیر جانبداری کا معیار بتدریج کم ہورہا ہے، استعفے منظور کرنے ہیں تو سب منظور کریں، استعفوں کی سلیکشن بدنیتی پر مبنی ہے۔دوسری طرف فرخ حبیب کا کہنا تھا کہ سپیکر کو معلوم ہوا اپوزیشن لیڈر کو فارغ کرنے والے ہیں تو انہوں نے بدنیتی سے 35 استعفے قبول کرلیئے، ساتھ ہی الیکشن کمیشن نے ڈی نوٹیفائی بھی کردیا۔واضح رہے کہ سپیکر قومی اسمبلی راجہ پرویز اشرف نے پی ٹی آئی کے 123 میں سے 35 ارکان کے استعفے منظور کرلئے جس کے بعد الیکشن کمیشن نے تحریک انصاف کے ارکان اسمبلی کو ڈی نوٹیفائی بھی کردیا۔اس سے قبل پی ٹی آئی چیئرمین عمران خان سمیت دیگر پارٹی رہنما اسپیکر قومی اسمبلی سے تمام 123 استعفے منظور کیئے جانے کا مطالبہ کر چکے ہیں۔
