اسلام آباد(وقائع نگارخصوصی)وفاقی وفاقی وزیر خزانہ سینیٹر اسحاق ڈار نے پاکستان تحریک انصاف (پی ٹی آئی )کے چیئرمین اور سابق وزیراعظم عمران خان کو معیشت پر براہ راست مذاکرے کا چیلنج دیتے ہوئے کہا ہے کہ عمران نیازی میں آپ کو آئینہ دکھاو¿ں گا، معاشی بدحالی کے ذمہ دار ہم نہیں عمران نیازی ہیں،عمران خان اپنے معاشی اعداد و شمار لے آئیں تو بحث کر لیں گے ۔
”پاکستان ٹائم “ کے مطابق اسلام آباد میں پریس کانفرنس کرتے ہوئے سینیٹر اسحاق ڈار نے کہا کہ پاکستان کے آج جو حالات ہیں وہ عمران نیازی کی وجہ سے ہیں، پاکستان کی آج کی تباہی کے ذمہ دار عمران نیازی ہیں، عمران خان نے جھوٹی پریس کانفرنس کی، عمران نیازی جھوٹ بولنے کے عادی ہیں، عمران خان نے آج پھر ایک جھوٹ بولا، عمران خان کا موٹو اور نصب العین الٹ ہے۔انہوں نے کہا کہ آپ مان چکے ہیں کہ چوری شدہ الیکشن کے ذریعے آپ کو لایا گیا، آپ نام بھی بتاچکے کہ کون آپ کو لایا تھا، آپ کو اچھی بھلی معیشت ملی تھی، اس پر کام کرنے کے بجائے سیاسی انتقام کی پالیسی پر نہ چلتے تو آج پاکستان اس حالت کو نہ پہنچا ہوتا جہاں آج کھڑا ہے، آپ کی سوچ یہ ہے کہ آپ کی سیاست جاتی ہے تو ریاست بھی جائے، عمران خان نے جی ڈی پی پر غلط بیانی کی، ن لیگ کے دور میں فی کس آمدنی میں 379 ڈالر اضافہ ہوا جبکہ پی ٹی آئی دور میں صرف 30 ڈالر کا اضافہ ہوسکا،مہنگائی کا طوفان عمران حکومت کی وجہ سے آیا، یہ سیاسی انتقام میں لگے رہے، معیشت پر توجہ نہیں دی، پی ٹی آئی حکومت نے روپے کا بیڑہ غرق کیا، عمران خان جس ملک بھی گئے پاکستان کو بدنام کیا، ہمارے دور میں معاشی ترقی (جی ڈی پی) کی شرح 6.10 فیصد جبکہ پی ٹی آئی دور میں 5.8 فیصد تھی، ہمیں 244 ارب ڈالر کی معیشت ملی تھی جسے ہم پانچ سال میں 356 ارب ڈالر تک لے کر گئے، معیشت میں 112 ارب ڈالر اضافہ کیا، پی ٹی آئی 4 سال میں اسے صرف 26 ارب ڈالر اضافہ سے 382.4 ڈالر تک لے جاسکی، عمران خان کے دور میں ملکی قرضوں میں بے پناہ اضافہ ہوا، قوم کو لیکچر نہ دیں، ملک کو تباہ کرنے پر معافی مانگیں، عمران خان بتائیں آپ نے کتنی لوڈشیڈنگ ختم کی؟ ن لیگ حکومت میں آئی تو 18، 18 گھنٹے کی لوڈشیڈنگ ملی تھی، عمران خان یا تو لاعلم ہیں یا ان کو غلط معلومات دی جاتی ہیں،تمام معاشی اشاریوں کا انہوں نے بیڑہ غرق کیا، پی ٹی آئی کرنٹ اکاو¿نٹ خسارہ ساڑھے 17 ارب ڈالر پر چھوڑ کرگئی، عمران خان عوام کو گمراہ کرنا بند کریں، پی ٹی آئی حکومت آئی ایم ایف سے معاہدہ کرکے پیچھے ہٹ گئی۔
وفاقی وزیر خزانہ سینیٹراسحاق ڈار نے معاشی حقائق پر سابق وزیراعظم عمران خان کو مناظرے کا چیلنج کرتے ہوئے کہا کہ آپ اپنے معاشی ماہرین لے آئیں، اعداد و شمار پر بحث کرلیں، عمران خان 55 لاکھ نوکریاں دینے کا کوئی ثبوت دکھادیں، ان کا ماننا ہے کہ جھوٹ اتنا بولو کہ عوام کو سچ لگنے لگے، عمران خان کے پیدا کردہ برے حالات کے بعد ہم نے ریاست کو بچایا ہے، ہمارے پاس دو راستے تھے، سیاست بچائیں یا ریاست بچائیں، ہم نے سیاست پر ریاست کو ترجیح دی، معاشی مسائل کی تمام ذمہ داری عمران خان اور ان کی حکومت پر آتی ہے، عمران خان ہم آپ کی تباہی کو ٹھیک کر رہے ہیں۔
