اسلام آباد(وقائع نگار خصوصی)پاکستان پیپلز پارٹی نے عمران خان کی جانب سے سابق صدر آصف علی زرداری پر ’قتل کے منصوبے‘ کے الزام کی شدید مذمت کرتے ہوئے قانونی چارہ جوئی کرنے کا اعلان کرتے ہوئے کہا ہے کہ ہم عمران خان کو قانونی نوٹس بجھوا رہے ہیں ،سپریم کورٹ عمران خان کے بیان کا نوٹس لے اور تحقیقات ہونی چاہیے، عمران خان ثبوت نہ دیں تو انہیں سزا ملنی چاہیے۔
”پاکستان ٹائم “ کے مطابق پیپلز پارٹی کے سیکرٹری جنرل نیئر بخاری نے قمر زمان کائرہ،فرحت اللہ بابر سمیت دیگر کے ہمراہ پریس کانفرنس کرتے ہوئے کہا کہ عمران خان نے ہمیشہ الزامات کی سیاست کی ہے،انہوں نے گزشتہ روز بھی آصف زرداری پر سنگین الزام لگایا،پیپلز پارٹی عمران خان کے جھوٹے الزام کو مسترد کرتی ہے جبکہ عمران خان نے خود شدت پسندوں سے معاہدہ کیا،انہیں صوبائی اسمبلیاں تحلیل نہیں کرنے چاہیئے تھیں،عمران خان ڈپریشن کا شکار ہیں۔نیئر بخاری نے کہا کہ سابق وزیر اعظم عمران خان کے الزامات کی کوئی حقیقت نہیں،پیپلزپارٹی کی قانونی ٹیم عمران خان کو نوٹس جاری کرے گی،عمران خان اپنے بیان کو واپس لیں،اگر انہوں نے ایسا نہ کیا تو پیپلزپارٹی عدالتوں میں جائے گی۔
قمر زمان کائرہ نے کہا کہ عمران خان جب بھی مشکل اور ذہنی دباو کا شکار ہوتے ہیں اپنی ناکامیوں کو اپنے مخالفوں پر ڈال کر وہ سنسنی خیزی پھیلاتے ہیں اور اداروں کر حملے کرتے ہیں،عمران خان کی سیاست کی پوری تاریخ الزام تراشی پر گردش کرتی ہے،اس سے قبل بھی انہوں نے اپنے خلاف عالمی سازشوں کا پلندہ چھیڑا تھا،جب ادارے عمران خان کے ساتھ ہوتے ہیں تو وہ ایک پیچ پر ہوتے ہیں لیکن جب ادارے ’نیوٹرل‘ ہونے کا فیصلہ کرتے ہیں تو عمران خان اداروں کو ’گالیاں‘ دینا شروع ہو جاتے ہیں،مخالفوں کو جیلوں میں ڈالنا،الزام تراشی کرنا،سنسی خیزی پھیلانا عمران خان کی سیاست کا وطیرہ ہے،ان کی سیاست جمہوری نہیں بلکہ فاشزم پر مبنی ہے،عمران خان کا حالیہ الزام انتہائی گھناونا ہے، پیپلز پارٹی ان الزامات کی شدید الفاظ میں مذمت کرتی ہے،میڈیا اور عوام کو عمران خان سے مطالبہ کرنا چاہیے کہ وہ ثبوت سامنے لائیں۔
قمر زمان کائرہ نے سپریم کورٹ سے مطالبہ کیا کہ عدلیہ پی ٹی آئی چیئرمین کے الزامات کی تحقیقات کرے،اگر ان الزامات میں کوئی شخص ملوث ہے تو سخت سزا دینی چاہیے،اگر عمران خان ثبوت پیش کرنے میں ناکام ہوتے ہیں تو عمران خان کے خلاف کارروائی ہونی چاہیے،عمران خان جب چاہیں الزام تراشی،لوگوں کی عزت اچھالتے ہیں اور ان کی زندگیوں کو نفرت کا شکار کرتے ہیں،ان کے بیان سے انتہائی تکلیف پہنچی ہے۔
پیپلزپارٹی کے رہنما فرحت اللہ بابر نے عمران خان کے الزامات کو دہراتے ہوئے کہا کہ عمران خان کو سوچنا چاہیے کہ کیا ان کے دشمن انہیں قتل کرنے کے لیے کیا عسکریت پسندوں کو ہائیر کریں گے؟عمران خان خود ’طالبان خان‘ ہے،جو خود عسکریت پسندوں کا سرپرست ہے،عمران خان بوکھلاہٹ کا شکار ہیں،اقتدار کھونے کے بعد ان کا دماغ کام کرنے سے قاصر ہے،اس میں پیپلزپارٹی اور آصف زرداری کا کوئی قصور نہیں،ایسے الزمات لگا کر عمران خان خود اپنا مذاق بنا رہے ہیں۔
