کوہاٹ(وقاےع نگار)خیبرپختونخوا کے ضلع کوہاٹ کے علاقے تاندہ جھیل میں کشتی الٹنے سے مدرسے کے 11طلباء جاں بحق جبکہ 17 کو بچالیا گیا،ڈوبنے والے معصوم طلباء کی عمریں 15 سے 16 سال کے درمیان ہیں جبکہ کشتی میں 30 بچے سوار تھے،ریسکیو کا سرچ آپریشن جاری ہے۔
”پاکستان ٹائم “ کے مطابق صوبہ خیبر پختونخوا کے ضلع کوہاٹ میں کشتی ڈوبنے کا واقعہ پیش آیا ہے جہاں تاندہ جھیل میں کشتی الٹ جانے سے مدرسہ میر باش خیل کے 30سے زائد طلباء ڈوب گئے۔واقعے کی اطلاع ملتے ہی ریسکیو ٹیمیں جائے حادثہ پر پہنچ گئیں،کشتی الٹنے سے 11 طلباء جاں بحق ہوگئے۔غوطہ خوروں نے اب تک 17 طلباء کو بچالیا جبکہ مزید دو ڈوبنے والے طلباء کی تلاش جاری ہے۔ریسکیو ذرائع کے مطابق کشتی میں گنجائش سے زیادہ افراد سوار تھے جس کے باعث کشتی الٹی۔دوسری جانب نگران وزیر اعلیٰ خیبر پختونخوا محمد اعظم خان نے کوہاٹ میں کشتی ڈوبنے کے واقعے پر افسوس کا اظہار کرتے ہوئے ڈوبنے والے طلباء کی بحفاظت بازیابی کے لئے نیک خواہشات کا اظہار کیا۔اعظم خان نے ضلعی انتظامیہ کو ہنگامی بنیادوں پر ریسکیو آپریشن شروع کرنے کی ہدایت کرتے ہوئے کہا کہ ڈوبنے والے طلباء کی بحفاظت بازیابی کے لئے تمام دستیاب وسائل بروئے کار لائے جائیں۔انہوں نے ہدایت کی کہ کمشنر اور ڈپٹی کمشنر کوہاٹ ریسکیو کاروائیوں کی خود نگرانی کریں۔
