بہاولپور(وقائع نگار)پاکستان مسلم لیگ (ن) کی سینئر نائب صدر اور چیف آرگنائزر مریم نواز نے کہا ہے کہ آج اگر پیٹرولیم مصنوعات کی قیمتیں بڑھی ہیں تو اس کی وجہ عالمی مالیاتی فنڈ (آئی ایم ایف) سے کیا گیا وہ معاہدہ ہے جس سے عمران خان نے ملک کو گروی رکھ دیا۔
بہاولپور میں پارٹی ورکرز کنونشن سے خطاب کرتے ہوئے مریم نواز نے کہا کہ مجھے علم ہے کہ پاکستان میں مہنگائی ہے جس کا مجھے نہ صرف احساس ہے بلکہ دل کو تکلیف ہے، ملک میں آٹا، چینی، پیٹرول، گھی سمیت تمام اشیا مہنگی ہیں جس کا مجھے نہ صرف احساس ہے بلکہ دل کو بھی تکلیف ہے کیونکہ جب آپ کے گھروں پر پریشانیاں آتی ہیں تو اس سے بڑی پریشانیاں ہمارے دلوں پر آتی ہیں، مشکل فیصلوں سے نواز شریف لندن میں پریشان ہیں مگر ہمیں ضرور دیکھنا چاہیے کہ جو مشکل فیصلے کیے جارہے ہیں اور ملک ہچکولے کھاتا ہے اس کی وجہ کیا ہے؟ 2018 سے 2022 تک جن حالات سے ملک گزر کر آیا ہے شکر کریں پاکستان بچ گیا ہے اور تباہی کے دھانے تک پہنچ کر واپس آیا ہے ورنہ یہ تو اگلے 12 برس کا منصوبہ بھی بنا کر بیٹھے تھے۔ان کا کہنا تھا کہ آج اگر ہمیں پیٹرولیم مصنوعات کی قیمتیں بڑھانا پڑتی ہیں تو اس کی وجہ عالمی مالیاتی ادارے( آئی ایم ایف) سے کیا گیا وہ معاہدہ ہے جو عمران خان نے کیا تھا جس کے بدلے نہ صرف ملک کی تقدیر آئی ایم ایف کے حوالے کردی بلکہ ملک کو بھی گروی رکھ دیا،ن لیگ کے لیے بہت آسان تھا کہ جس دن عمران خان نے اسمبلیاں توڑیں تو ہم الیکشن میں چلے جاتے اور اگر اس وقت الیکشن میں جاتے تو دو تہائی اکثریت سے جیت کر آتے، جو شخص ملک کو سری لنکا بنانے کی خواہش رکھ کر بیٹھا ہے شہباز شریف اور نواز شریف نے ملک کو سری لنکا بننے سے بچایا ہے، جس گروہ نے ملک کو بے دردی سے لوٹا ہے جو عمران اور اس کے سہولت کار پانچ کا ٹولہ تھا اب وہ اپنے انجام کو پہنچے ہیں اور اس پانچ کے ٹولے میں چاہے کھوسہ ہو، ڈیم والے بابا ہو، عمران ہو یا اس کی دو بے ساکھیاں ہوں تمام کے تمام اپنے انجام کو پہنچے ہیں۔
مریم نواز نے کہا کہ اگر پاکستان کے 75 برسوں میں سے نواز شریف کی حکومت کے 9 برس نکالے جائیں تو پھر پاکستان میں کھنڈرات رہتے ہیں، جو بھی منصوبہ دکھاتے ہیں اس پر نواز شریف کا نام آتا ہے، نواز شریف کو دکھ اس بات کا نہیں کہ اس کی حکومت چلی گئی لیکن ان کو دکھ اس بات کا ہے کہ 2013 سے 2018 تک ایک ایک کرکے کامیابیاں سمیٹی تھیں وہ سب پانچ کے ٹولے نے گنوا دی اور 2016 اور 17 میں جب پاناما کا ڈرامہ لایا گیا تو عمران خان روز ٹی وی پر آکر کہتا تھا کہ ساری خرابیوں کی جڑ نواز شریف ہے، اگر وہ سچ تھا تو پھر گزشتہ چار برس میں تو دودھ اور شہد کی نہریں بہنی چاہیے تھیں، اگر یہ لوگ سمجھ رہے ہیں کہ مسلم لیگ ن الیکشن سے ڈرتی ہے تو سن لیں اب مسلم لیگ ن میدان میں اتر چکی ہے اور جب بھی انتخابات ہوئے مسلم لیگ ن کلین سوئپ کرے گی۔
