اسلام آباد(وقائع نگار خصوصی)سابق رکن قومی اسمبلی راشد شفیق نے کہا ہے کہ سابق وزیر داخلہ شیخ رشید اسلام آباد کے کسی تھانے میں موجود نہیں ہیں۔
”پاکستان ٹائم “ کے مطابق میڈیا سے گفتگو کرتے ہوئے شیخ رشید کے بھتیجے راشد شفیق نے دعوی کیا ہے کہ گزشتہ روز تھانہ سیکریٹریٹ میں شیخ رشید سے ملاقات کروائی گئی تھی،جہاں شیخ رشید نے بتایا ان کی آنکھوں پر پٹیاں باندھ کر لے جایا جاتا ہے انہیں کراچی قتل کروانے کے لے بھیجا جا رہا ہے۔انہوں نے کہا کہ اس وقت کراچی پولیس بھی اسلام آباد موجود ہے اور شیخ رشید کے بارے میں کچھ پتا نہیں چل رہا کہ انہیں کہاں لے جایا گیا ہے؟ہمیں شیخ رشید کی زندگی کے حوالے سے تشویش ہے،ہمیں خدشہ ہے کہ ظالم حکومت انہیں مروا دے گی،شیخ رشید کی”گم شدگی“بارے میں بتانے کے لئے کوئی بھی تیار نہیں ہے۔واضح رہے اسلام آباد کی سیشن عدالت نے سابق وزیر داخلہ شیخ رشید کا دو روزہ جسمانی ریمانڈ منظور کرتے ہوئے انہیں پولیس کی تحویل میں دیا تھا تاہم پولیس کی جانب سے شیخ رشید کے 8 روزہ جسمانی ریمانڈ کی استدعا کی گئی تھی۔
یہ بھی یاد رہے کہ سابق صدر آصف زرداری پر عمران خان کے قتل کی سازش کے بیان پر شیخ رشید کے خلاف مقدمہ درج ہے۔شیخ رشید پر تھانہ مری اور کراچی میں نئے مقدمات درج کر لئے گئے ہیں۔دوسری جانب شیخ رشید احمد نے اسلام آباد سے کراچی اپنی منتقلی روکنے کے لیے عدالت سے رجوع کرلیا ہے۔وکیل سردار عبدالرزاق خان کی وساطت سے دائر درخواست میں کہا گیا ہے کہ عمران خان نے آصف زرداری پر قتل کا الزام لگایا جس کا میں نے حوالہ دیا،میرے خلاف مقدمات میں مدعی متاثرہ فریق نہیں۔سیاسی بیان بازی کی بنا پر مزید مقدمات درج کرنے سے روکا جائے نیز آبپارہ،مری اور کراچی کے مقدمات غیر قانونی قرار دے کر کالعدم قرار دیں۔کراچی کا مقدمہ اختیار سے تجاوز قرار دیا جائے یا اسلام آباد منتقل کیا جائے۔عدالت کیس کے حتمی فیصلے تک کراچی منتقلی سے روکنے کا حکم جاری کرے۔شیخ رشید کی جانب سے ہائیکورٹ میں دائر درخواست میں اسلام آباد،سندھ اور پنجاب کے آئی جیز،سیکرٹری داخلہ کو فریق بنایا گیا ہے۔
