کراچی(کامرس رپورٹر) پاکستان میں ٹویوٹا گاڑیاں بنانے والی’انڈس موٹر کمپنی “نے خریداروں کو بکنگ کی رقم واپس کرنا شروع کر دی ہے اور اس بات پر افسوس کا اظہار کیا کہ موجودہ معاشی حالات نے اس کے لیے پیداوار جاری رکھنا مشکل بنا دیا ہے۔
”پاکستان ٹائم کے مطابق ملک میں 35سال سے ٹویوٹا گاڑیاں بنانے والی انڈس موٹر کمپنی نے اپنے صارفین کو سود کے ساتھ مکمل رقم کی واپسی کا آپشن پیش کرتے ہوئے کہا ہے کہ کمپنی کی پیداوار فروری اور مارچ میں بہت کم رہے گی۔انڈس موٹر کمپنی کے چیف ایگزیکٹو آفیسر علی اصغر جمالی نے اسلام آباد میں میڈیا سے گفتگو کرتے ہوئے کہا کہ حکومت کو سیاسی استحکام لانے،ہمسایہ ممالک کے ساتھ تجارتی تعلقات کو ہم آہنگ کرنے اور تیل کی درآمدات کو کم کرنے اور بجلی کی بچت کے لیے دن کی روشنی کے اوقات کو بروئے کار لانا چاہیے، مکمل طور پر ناک ڈاون(سی کے ڈی) کٹس پر درآمدی پابندیاں آٹو انڈسٹری کے لیے تباہ کن ثابت ہوئی ہیں،ہم فی الحال اپنی صلاحیت کے 40 سے 45 فیصد پر کام کرنے پر مجبور ہیں،جب تک ان پابندیوں میں نرمی نہیں کی جاتی،پلانٹ کی مکمل بندش اور پیداوار کو مکمل طور پر روکنا ناگزیر ہو جائے گا۔انڈس موٹر کمپنی کے چیف ایگزیکٹو آفیسر علی اصغر جمالی نے کہا کہ یہ فیصلے ملک کے نازک معاشی حالات کے ساتھ صنعت کو مزید نقصان پہنچائیں گے،روپے کی قدر میں مسلسل کمی پیداوار کی لاگت کو بڑھادے گی،جس کے نتیجے میں آنے والی سہ ماہیوں میں کم حجم،طلب اور رسد کے مسائل اور کم مارجن کی وجہ سے مینو فیکچررز کی نچلی لائن کو محدود کر دے گا۔
