اسلام آباد(سٹاف رپورٹر)ملک بھر میں آج نہتے کشمیریوں سے اظہارِ یکجہتی کیلئے ”یوم یکجہتی کشمیر“ قومی عزم و جذبے کے ساتھ منایا جا رہا ہے،وزیر اعظم شہباز شریف اور سردار تنویر الیاس خان کا مظفر آباد میں آزاد کشمیر قانون ساز اسمبلی کے خصوصی اجلاس سے خطاب،مظلوم کشمیریوں سے یک جہتی کے لئے پوری قوم سڑکوں پر نکل آئی ”کشمیر بنے گا پاکستان “لے کے رہیں آزادی“ کے فلک شگاف نعرے،ہاتھوں کی زنجیروں سے پاکستانی قوم نے بھارت کو پیغام دے دیا ۔
”پاکستان ٹائم “ کے مطابق کشمیریوں کے شانہ بشانہ کھڑے ہونے کا عزم لیے قوم آج یوم یکجہتی کشمیر منا رہی ہے، اس موقع پر پاکستان بھر میں ریلیاں،تقاریب اور سیمینار منعقد ہو رہے ہیں۔یہ دن بھارت کے غیر قانونی طور پر مقبوضہ جموں و کشمیر میں کشمیریوں پر بھارتی قابض افواج کی جانب سے ڈھائے جانے والے بدترین ظلم و ستم کو بے نقاب کرنے کے لیے بھی منایا جاتا ہے۔کشمیری شہدا کو خراج عقیدت پیش کرنے کے لیے صبح 10 بجے سائرن بجتے ہی ٹریفک رک گئی اور ایک منٹ کی خاموشی اختیار کی گئی۔کوہالہ سمیت پاکستان اور آزاد کشمیر کو ملانے والے دیگر اہم مقامات پر انسانی ہاتھوں کی زنجیریں بنائی گئیں۔وزیر اعظم پاکستان محمد شہباز شریف اور وزیر اعظم آزاد کشمیر سردار تنویر الیاس خان نے مظفر آباد میں آزاد کشمیر قانون ساز اسمبلی کے خصوصی اجلاس سے خطاب کرتے ہوئے مظلوم کشمیری بھائیوں کے ساتھ یکجہتی کا اظہار کیا اور کہا کہ گزشتہ 75 سال سے بھارت نے جموں و کشمیر پر ناجائز قبضہ کر رکھا ہے،بھارت،پاکستان،اقوام متحدہ اور کشمیری عوام کے ساتھ کیے گئے وعدوں کا احترام کرے، کشمیری بہن بھائیوں کو یقین دلاتے ہیں کہ ہم ان کے ساتھ کندھے سے کندھا ملا کر کھڑے ہیں۔
دوسری طرف وزیر خارجہ بلاول بھٹو نے یوم یکجہتی کشمیر پر اپنے پیغام میں کہا کہ پاکستانی عوام اپنے کشمیری بھائیوں اور بہنوں کی قربانیوں کو سلام پیش کرتے ہیں،کشمیری مسلسل خوف کی حالت میں زندگی بسر کر رہے ہیں، بھارت کو مقبوضہ جموں و کشمیر میں انسانی حقوق کی سنگین خلاف ورزیاں ختم کرنا ہوں گی،بھارت کشمیر میں غیرقانونی اقدامات کو واپس لے اور اقوام متحدہ کی قرار دادوں پر عمل درآمد کرے،کشمیریوں کو یو این کی قراردادوں کے مطابق حق خودارادیت ملنا چاہئے اور کشمیریوں پر آزادی کے عزم کو دبایا نہیں جا سکتا۔
