پرویز مشرف کی میت پاکستان پہنچ گئی ،نماز جنازہ کب اور تدفین کہاں ہو گی؟جانئے

کراچی(وقائع نگار خصوصی) سابق صدر جنرل (ر)پرویز مشرف کی میت کو غسل دینے کے بعد خصوصی طیارے پر دبئی سے کراچی پہنچ گئی ،ائیرپورٹ پر اعلیٰ فوجی حکام اور ان کے اہل خانہ سمیت رشتہ دار موجود تھے جنہوں نے سابق صدر کی میت وصول کی ۔
”پاکستان ٹائم “ کے مطابق سابق صدر پرویز مشرف کی میت دبئی سے کراچی پہنچ گئی ہے ،پاک فوج کے سابق سربراہ کی نمازجنازہ کل(منگل کے روز) دوپہر پونے 2بجے کراچی پولوگراو¿نڈملیرکینٹ میں اداکی جائے گی جبکہ انہیں فوجی قبرستان میں سپرد خاک کیا جائے گا۔ اولڈ فوجی قبرستان میں پرویز مشرف کی قبر تیار کرلی گئی ہے اور قبرستان کے اطراف سیکیورٹی کے سخت انتظامات کئے گئے ہیں، رینجرز نے قبرستان کی سیکیورٹی انتظامات سنبھال لیے ہیں۔اس سے قبل سابق صدر پرویز مشرف کی میت کو لانے والا خصوصی طیارے اے 319 نے آٹھ بج کر پانچ منٹ پر کراچی کے جناح ٹرمینل پر لینڈ کرنا تھا تاہم دبئی سے روانگی میں تاخیر کے باعث جہاز دبئی سے دو گھنٹے کی تاخیر سے روانہ ہوا ۔سفارتی حکام کے مطابق دبئی قونصل خانے نے پرویز مشرف کی میت منتقل کرنے کیلئے این او سی جاری کیاتھا اور پاسپورٹ کینسل کیا تھا ۔ خیال رہے کہ سابق صدر جنرل (ر) پرویزمشرف اتوار کے روز دبئی میں انتقال کرگئے تھے۔ وہ طویل عرصے سے امریکن ہسپتال دبئی میں زیرعلاج تھے۔ سابق صدر جنرل(ر) پرویز مشرف 11 اگست 1943 کو دہلی میں پیدا ہوئے تھے، ان کا انتقال 79 سال کی عمر میں ہوا۔ جنرل (ر) پرویز مشرف 7 اکتوبر 1998 کو چیف آف آرمی سٹاف کے عہدے پر فائز ہوئے تھے، 12 اکتوبر 1999 کو وہ سابق وزیراعظم نواز شریف کو ہٹا کر چیف ایگزیکٹو بنے اور بعد ازاں اپریل 2002 میں ریفرنڈم کراکے باقاعدہ صدر پاکستان منتخب ہوئے۔سال 2004 میں آئین میں 17 ویں ترمیم کے ذریعے مزید 5 سال کے لیے پرویز مشرف باوردی صدر منتخب ہوئے، پرویز مشرف 18 اگست 2008 کو مستعفی ہوکر ملک سے باہر چلے گئے تھے۔