اسلام آباد(وقائع نگار خصوصی)حکومت کی جانب سے ایک بار پھر آل پارٹیز کانفرنس( اے پی سی)ملتوی کرنے کا بیان سامنے آیا ہے۔
”پاکستان ٹائم “ کے مطابق مائیکرو بلاگنگ ویب سائٹ پر ٹویٹ کرتے ہوئے وفاقی وزیر اطلاعات مریم اورنگزیب کا کہنا تھا کہ ترکیہ اور شام میں زلزے سے ہونے والی بدترین تباہی پر اظہارِ افسوس اور یکجہتی کے لیے وزیر اعظم شہباز شریف ترکیہ کا دورہ کردیں گے جس کے باعث حکومت نے کثیر الجماعتی کانفرنس موخر کردی،وزیر اعظم شہباز شریف کل صبح انقرہ روانہ ہوں گے،وہ صدر رجب طیب اردوان سے زلزلے کی تباہی،جانی نقصان پر افسوس اور تعزیت،ترکیہ کے عوام سے یک جہتی کریں گے۔مریم اورنگزیب کا کہنا تھا کہ وزیراعظم کے دورہ ترکیہ کی وجہ سے جمعرات 9 فروری کو بلائی گئی اے پی سی موخر کی جا رہی ہے،اتحادیوں کی مشاورت سے نئی تاریخ کا اعلان ہو گا۔
واضح رہے کہ گزشتہ ماہ بروز پیر 30 جنوری کو پشاور میں پولیس لائنز کی مسجد میں خود کش حملے میں 87 افراد شہید اور 200 سے زائد افراد زخمی ہوئے تھے جس کے بعد دہشت گردی سمیت اہم قومی اہمیت کے مسائل و معاملات پر غور و خوض اور اتفاق رائے کے لیے آل پارٹیز کانفرنس طلب کرنے کا فیصلہ کیا گیا تھا۔کانفرنس میں پاکستان تحریک انصاف (پی ٹی آئی) کے چیئرمین عمران خان سمیت تمام قومی سیاسی جماعتوں کی قیادت کو مدعو کیا تھا۔ایک روز قبل ہی کانفرنس کی تاریخ 7 فروری سے تبدیل کر کے 9 فروری کی گئی تھی جسے اب مزید ملتوی کر دیا گیا ہے۔
