جہلم(سٹاف رپورٹر)ملتان میں الیکشن کمیشن کے دفتر پر ہنگامہ آرائی سے متعلق کیس میں پولیس نے پاکستان تحریک انصاف( پی ٹی آئی) کے سابق رکن قومی اسمبلی ملک عامر ڈوگر سمیت متعدد کارکنان کو گرفتار کرلیا۔، اس گرفتاری پر سابق وفاقی وزیر اطلاعات چوہدری فواد حسین نے سخت ردعمل دیتے ہوئے کہا ہے کہ محسن نقوی خود کو حمزہ شہباز سے زیادہ وفادارثابت کرنا چاہتے ہیں، ہم ”جیل بھرو تحریک “کا اعلان پہلے ہی کرچکے ہیں، عامر ڈوگر کی گرفتاری” جیل بھرو تحریک “کا حصہ ہے اور انہیں گرفتار کرکے اس تحریک کا آغاز ہوگیا ہے۔
”پاکستان ٹائم “ کے مطابق ملک عامر ڈوگر کی گرفتاری کے بعد میڈیا سے گفتگو کرتے ہوئے فواد چوہدری کا کہنا تھا کہ عامر ڈوگر کی گرفتاری ظلم و فسطایت کی داستان کی عکاسی کرتی ہے جس کی مذمت کرتا ہوں۔
الیکشن کمیشن کو ایک بار پھر تنقید کا نشانہ بناتے ہوئے پی ٹی آئی رہنما کا کہنا تھا کہ الیکشن کمیشن لگتا ہے پاکستان ڈیموکریٹک موومنٹ (پی ڈی ایم) کی ذیلی تنظیم ہے، چیف الیکشن کمشنرآئین کی خلاف ورزی کر رہے ہیں۔اس سے قبل جہلم میں میڈیا سے گفتگو کرتے ہوئے قومی اسمبلی میں استعفوں پر فواد چوہدری کا کہنا تھا کہ ہم نے استعفے اجتماعی مقصد کے لیے دیئے، ہمارا خیال تھا کہ الیکشن میں جانا چاہیے، آج ہائی کورٹ نے اسی نقطے پران نشستوں کو معطل کردیا لہٰذا کل پرسوں ہم ان الیکشن کے سٹے کے لیے رجوع کر رہے ہیں تاکہ جو جعلی اپوزیشن لیڈر بیٹھا ہوا ہے،اسے ہم نکال سکیں۔دوسری طرف پولیس کا کہنا ہے کہ ملک عامر ڈوگر نے خود کارکنان کے ساتھ گرفتاری دی ہے، زیر حراست کارکنان نے الیکشن کمیشن کے دفتر پرہنگامہ آرائی کی تھی۔ یاد رہے کہ ملتان میں الیکشن کمیشن کے دفتر میں پاکستان مسلم لیگ (ن) اور پی ٹی آئی کے کارکنان میں جھگڑا ہوا، اس دوران ایک دوسرے پر گملوں سے حملہ کیا گیا۔ جھگڑے میں الیکشن کمیشن آفس کے دروازوں کے شیشے بھی ٹوٹ گئے۔ ملتان میں پی ٹی آئی کے ارکان کی گرفتاری کے بعد پولیس نے ن لیگ کے ارکان کی گرفتاریاں بھی شروع کردیں، پولیس نے ن لیگ کے امیدوار طارق رشید اور ملک انور کو گرفتار کرلیا ہے۔
