اسلام آباد(کرائم رپورٹر)کاونٹر ٹیررازم ڈیپارٹمنٹ (سی ٹی ڈی) اور وفاقی حساس ادارے نے راولپنڈی میں کارروائی کرتے ہوئے دہشتگردی کا بڑا منصوبہ ناکام بنادیا، آپریشن کے دوران دو انتہائی مطلوب دہشتگرد گرفتار کر لئے گئے۔
”پاکستان ٹائم “ کے مطابق سیکیورٹی فورسز کو بڑی کامیابی حاصل ہوئی ہے جس کے نتیجے میں وفاقی دارالحکومت اور راولپنڈی میں دہشت گردی کا خوفناک منصوبہ ناکام ہو گیا ہے ،سیکیورٹی فورسز نے کارروائی کرتے ہوئے دو انتہائی مطلوب دہشت گردوں کو حراست میں لے لیا ہے ۔ گرفتار دہشت گردوں نے جڑواں شہروں میں مختلف مقامات کی ریکی کر کے تصاویر افغانستان میں موجود کمانڈر بھی بھجوائیں۔دونوں انتہائی مطلوب دہشت گردوں کا تعلق کالعدم تحریک طالبان پاکستان (ٹی ٹی پی) کے حاجی فقیر گروپ سے ہے۔سی ٹی ڈی پنجاب نے دہشت گردوں کی شناخت حیات اللہ اور وکیل خان کے نام سے کی ہے۔
دہشت گردوں نے انکشاف کیا کہ انہوں نے راولپنڈی پولیس لائنز پر حملہ آور ہونا تھا۔تھانہ صدر بیرونی اور ڈسٹرکٹ کورٹس راولپنڈی دہشت گردوں کا ٹارگٹ تھے، سینٹ پال چرچ بھی حاجی فقیر گروپ کا ٹارگٹ تھا۔کانونٹ سکول راولپنڈی، پولیس لائنز اسلام آباد میں تخریبی کارروائی ہونا تھی۔دہشت گردوں نے انکشاف کیا کہ تمام مقامات کی ریکی کرکے تصاویر ٹی ٹی پی کمانڈرکو بھجوائی گئیں۔سی ٹی ڈی پنجاب کا کہنا ہے کہ حاجی فقیر گروپ افغانستان سے آپریٹ کررہا ہے، ملزمان کے خلاف مقدمہ درج کرکے مزید تفتیش کی جاری ہے۔
