پشاور(سٹاف رپورٹر)خیبرپختونخوا پولیس کے سربراہ کو تبدیل کردیا گیا، معظم جاہ انصاری کی جگہ اب اختر حیات خان صوبے کے نئے انسپکٹر جنرل (آئی جی) ہوں گے۔
”پاکستان ٹائم “ کے مطابق دہشت گردی کے شکار صوبے خیبرپختونخوا پولیس کے سربراہ معظم جاہ انصاری کو تبدیل کرتے ہوئے اختر حیات خان کو صوبے کا نیا پولیس سربراہ مقرر کردیا گیا ہے جبکہ اس حوالے سے نوٹیفکیشن بھی جاری ہو گیا ہے ۔ وفاقی حکومت نے 6 فروری 2023 کو آئی جی خیبر پختونخوا کو تبدیل کرنے کا فیصلہ کرتے ہوئے نئے آئی جی کی تقرری کے لئے اسٹیبلشمنٹ ڈویژن سے نام مانگے تھے ۔آئی جی گلگت بلتستان محمد سعید وزیر کو آئی جی خیبر پختونخوا لگائے جانے کا امکان تھا تاہم قرعہ اختر حیات خان کے نام کا نکلا۔واضح رہے کہ دو روز قبل چیف الیکشن کمشنر کی جانب سے آئی جی خیبرپختونخوا معظم جاہ انصاری سے دہشت گردی سے متعلق بیان پر وضاحت مانگی گئی تھی۔اجلاس میں چیف الیکشن کمشنر نے انتخابات کی شفافیت پر زور دیتے ہوئے کہا تھا کہ انتخابات کے دوران غیر جانبدار افسران کی تعیناتی انتہائی ضروری ہے، صوبوں میں انتظامی پوسٹوں پر افسران کی تعیناتی غیر جانبداری کے ساتھ کی جائے۔معظم جاہ انصاری نے ایک پریس کانفرنس کے دوران آبدیدہ ہوتے ہوئے اعتراف کیا تھا کہ ادارے سے کوتاہی ہوئی ہے، حملہ آور کی چیکنگ کسی وجہ سے میرے جوانوں سے رہ گئی، میرے بچوں کی نہیں یہ میری کوتاہی ہے۔
