لاہور(سٹاف رپورٹر)سابق وزیر اعلیٰ پنجاب چوہدری پرویز الٰہی کے دست راست اور سیکرٹری پنجاب اسمبلی محمد خان بھٹی کی اہلیہ نے اپنے شوہر کی بازیابی کے لئے چیف جسٹس آف پاکستان جسٹس عمر عطا بندیال کو سووموٹو ایکشن لینے کے لئے خط لکھ دیا۔
”پاکستان ٹائم “ کے مطابق سندھ سے گرفتار ہونے والے سیکرٹری پنجاب اسمبلی محمد خان بھٹی کی اہلیہ نے چیف جسٹس کے نام خط لکھا ہے،جس میں انہوں نے محمد خان بھٹی کی بازیابی کے لئے جسٹس عمر عطا بندیال سے سوموٹو نوٹس لینے کا مطالبہ کیا ہے۔اہلیہ کوثر پروین نے کہا کہ اللہ تعالی کے بعد سپریم کورٹ سے ہی انصاف کی توقع ہے، چیف جسٹس اس مسئلے پر سوموٹو نوٹس لیں اور متعلقہ حکام کوعدالت میں پیش کرنے کا حکم دیں۔سیکرٹری پنجاب اسمبلی کی اہلیہ نے کہا کہ میرا شوہر سے 6 فروری کو آخری بار رابطہ ہوا تھا،محمد خان بھٹی نے بتایا کہ کچھ مشکوک افراد ان کا پیچھا کر رہے ہیں،انہیں بغیر یونیفارم کے کچھ نامعلوم افراد نے اغوا کر لیا ہے،سرکاری ایجنسیاں ان کی گرفتاری قبول کرنے پر تیار نہیں،محمد خان بھٹی کی زندگی مستقل خطرے میں ہے۔
یاد رہے کہ اس قبل چوہدری پرویز الٰہی نے بیان دیتے ہوئے کہا تھا کہ سیکرٹری اسمبلی محمد خان بھٹی کے معاملے پر سپریم کورٹ سے رجوع کرنے کا فیصلہ کیا ہے،سیکرٹری اسمبلی کا کیس مِسنگ پرسن کا کیس بن چکا ہے،گریڈ 22 کے آفیسر محمد خان بھٹی کئی روز سے لاپتہ ہیں،حکمران انتقامی کارروائیوں میں لاقانونیت کے مرتکب ہو رہے ہیں۔
