لاہور(سٹاف رپورٹر)سابق وزیراعلیٰ پنجاب چوہدری پرویز الٰہی نے پنجاب کی نگران حکومت کو کڑی تنقید کا نشانہ بناتے ہوئے کہا ہے کہ نگران سیٹ اپ ہوش کے ناخن لے، انتقامی کارروائیاں عمران خان کی مقبولیت کم نہیں کرسکتیں، لاہور ہائیکورٹ کے فیصلے نے آئین کی بالادستی یقینی بنانے کا پیغام دیا۔
”پاکستان ٹائم “ کے مطابق لاہور سے جاری ایک بیان میں سابق وزیراعلیٰ پنجاب چوہدری پرویز الٰہی کا کہنا تھا کہ قوم انتخاب کی تیاری کرے کیونکہ ووٹ کی طاقت سے نااہل ٹولے کے خلاف فیصلہ دینے کا وقت آگیا ہے، لاہور ہائیکورٹ کے فیصلے نے آئین کی بالادستی یقینی بنانے کا پیغام دیا ہے، فیصلے کے بعد انتخابی عمل میں تاخیر نہیں ہونی چاہئے۔ان کا کہنا تھا کہ معیشت کو تباہ کرنے والے شہباز شریف سے ووٹ کی طاقت سے بدلہ لیا جائے گا، مسلم لیگ ن نے اپنے ماضی سے سبق نہیں سیکھا، ملک کو ایک بار پھر انتقامی سرگرمیاں کا مرکز بنا دیا گیا ہے، حکمرانوں کو اپنے مقدمات سے ریلیف کے علاوہ کوئی فکر نہیں، نگران سیٹ اپ ہوش کے ناخن لے، انتقامی کارروائیاں عمران خان کی مقبولیت کم نہیں کرسکتیں۔
