کابل(سپورٹس ڈیسک)قومی کرکٹ ٹیم کے سابق فاسٹ بولر رانا نوید الحسن اور سابق اوپنر عمران فرحت نے افغانستان کرکٹ بورڈ کے ساتھ معاہدہ کرلیا۔
”پاکستان ٹائم “ کے مطابق رانا نوید الحسن کو افغانستان کرکٹ کے ہائی پرفارمنس سینٹر کا بولنگ کوچ مقرر کردیا گیا جبکہ عمران فرحت ان کے ساتھ ہائی پرفارمنس سینٹر میں بیٹنگ کوچ کی ذمہ داریاں نبھائیں گے۔
دونوں پاکستانی کرکٹرز نے افغان بورڈ کے ساتھ ایک سال کے معاہدے پر دستخط کردیے ہیں جبکہ ٹیم کی عمدہ پرفارمنس پر معاہدے میں توسیع ممکن ہوگی۔سابق اوپنر عمران فرحت کی 15 فروری کو روانگی طے ہے جبکہ رانا نوید الحسن پاکستان سپر لیگ (پی ایس ایل) کے آٹھویں ایڈیشن کے بعد کابل روانہ ہوں گے۔
افغان بورڈ سے ہونے والے معاہدے کے حوالے سے گفتگو کرتے ہوئے رانا نوید الحسن کا کہنا تھا کہ افغان بورڈ نے آفر کی تھی جس میں ڈھائی ہزار ڈالر ماہانہ تنخواہ سمیت دوسری مراعات شامل ہیں جبکہ پاکستان کرکٹ بورڈ( پی سی بی)اس کے نسبت بہت کم معاوضہ ادا کرتا ہے،دوسرا انٹرنیشنل اسائمنٹ کرنا ایک اعزاز کی بات ہے،کوشش ہوگی کہ کھیلنے اور کوچنگ کے تجربے سے افغانستان کے نوجوان کھلاڑیوں کو زیادہ سے زیادہ فائدہ دے سکوں۔دوسری جانب سابق پاکستانی اوپنر عمران فرحت نے بھی اس معاہدے پر خوشی کا اظہار کرتے ہوئے کہا کہ افغانی کھلاڑیوں میں بہت ٹیلنٹ ہے، کوشش کروں گا کہ بطور کوچ ان کی صلاحیتوں میں مزید نکھار لاوں۔
