اسلام آباد(سٹاف رپورٹر)پاکستان تحریک انصاف(پی ٹی آئی) کے رہنما اور سابق وفاقی وزیر اطلاعات فواد چوہدری نے خبر دار کرتے ہوئے کہا ہے کہ الیکشن کمیشن کو انتخابات کیلئے آج اجلاس منعقد کرنا چاہئے تھا،آئین اور عدالتی احکامات کو مذاق نہ بنائیں،آئین کے ساتھ کھلواڑ ملک کو مہنگا پڑے گا۔
”پاکستان ٹائم “ کے مطابق مائیکرو بلاگنگ ویب سائٹ پر ٹویٹ کرتے ہوئے فواد چوہدری کا کہنا تھا کہ الیکشن کمیشن کو انتخابات کیلئے آج اجلاس منعقد کرنا چاہئے تھا،آئین اور عدالتی احکامات کو مذاق نہ بنائیں،عدالت کے واضح احکامات کے بعد بھی عام تاثر ہے کہ چونکہ الیکشن کمیشن منشیوں پر مشتمل ہے،اس لئے اسلام آباد کی طرح صوبائی الیکشن بھی نہیں کرائے گا،آئین کے ساتھ یہ کھلواڑ ملک کو مہنگا پڑے گا،ہمارے پاس آئین ہی متفقہ دستاویز ہے،اگر آئین کو بھی روند دیا گیا تو پاکستان کی ریاست شدید خطرات کا شکار ہو جائے گی۔
سابق وفاقی وزیر نے کہا کہ بہت ہو گیا،آئین کی بالادستی کیلئے ہماری تحریک بالکل تیار ہے”جیل بھرو“ سے اس تحریک کا آغاز ہو گا اور آئین کی بحالی تک تحریک جاری رہے گی،نگران پنجاب حکومت نے 25 مئی کے واقعات میں ملوث بیورو کریٹس کو دوبارہ دھاندلی کی نیت سے صوبے میں تعینات کردیا ہے،ان سے کہتا ہوں خود پنجاب سے علیحدہ ہو جائیں، ریاست کے ساتھ اپنے حلف کا پاس کریں،کسی سیاسی پارٹی کا وفادار اہلکار ثابت کرنا سول سرونٹس کیلئے نامناسب ہے۔
